Outor: SS Francisco
Ora nos ta profesá nos fe, nos ta afirmá ku Iglesia ta katóliko i apostóliko. Pero, kua ta efektivamente e nifikashon di e dos notanan karakterístiko aki di Iglesia? I ki balor nan tin pa e komunidat kristian i pa kada un di nos? Katóliko Katóliko ta nifiká universal. Un definishon kompleto i kla nos a ser ofresé un di e Tatanan di Iglesia, san Cirilo di Herusalèm, ora el a afirmá: Iglesia sin duda ta yamá katóliko, ke men universal, dor di e echo di ku e ta plamá di tur banda, for di un parti hasta e otro di for di punto final di mundu ; i pasobra universalmente i sin desershon siña tur e bèrdatnan ku ser yega na konosementu di hendenan, ya sea tokante kosnan selestial, ku esnan terenal.
Signo evidente di katolisidat di Iglesia ta ku e ta papia tur lenga. I esaki no ta otro kos ku e efekto di Pentekòster: ta Spiritu Santu, en bèrdat, ku a prepará e Apòstelnan i henter Iglesia pa lag’é resoná na tur hende, hasta fin di mundu, E Bon Notisia di e salbashon i di e amor di Dios. Iglesia asina a nase katóliko, “sinfóniko” for di e orígen, i no por no ta katóliko, proyektá na e evangelisashon i na e enkuentro ku tur hende.
E Palabra di Dios ta ser lesá awe den tur lenga, tur persona tin e Evangelio den e propio lenga, pa les’é ta bin bèk riba dje. Semper ta bon tin huntu ku nos un Evangelio chikí pa karg’é den saku i durante dia lesa un pasashi. Esaki ta hasi nos bon, e Evangelio ta plamá den tur idioma pasobra Iglesia, e anunsio di Kristu Redentor, ta den hinter mundu. I ta p’esei ta bisa ku Iglesia ta katóliko, pasobra e ta universal.
