Dia 15 di sèptèmber último tabata dia internashonal di demokrasia proklamá pa Nashonnan Uní. E tema di e aña aki ta ‘empoderá e próksimo generashon’ i ta konsentrá su mes riba e papel esensial ku hóbennan mester tin pa avansá demokrasia i garantisá ku nan bos ta keda inkluí den desishonnan ku tin un impakto profundo riba mundu. E sekretario general di Nashonnan Uní na e okashon ei a trese dilanti ku riba dia internashonal di demokrasia nos ta selebrá e promesa ku a hasi na sosiedatnan i ta rekonosé a kantidat di menasanan ku demokrasia ta enfrentá den e momentonan aktual di tenshon i agitashon. Tumando na kuenta e último desaroyonan na Boneiru e palabranan di e sekretario general no tabata ménos profétiko. Un atentado serio a keda kometé kontra nos demokrasia lokal orkestrá pa partidonan den oposishon, asesorá pa e aktual grifir interino, Arjan de Wolff. Un akto ku BONERIANO ta konsiderá repugnante, mirando ku apénas riba Dia di Boneiru partidonan den oposishon a suprayá e importansia pa salbaguardiá demokrasia. Hipokresia no por yega mas leu ku esaki. E kolumna ‘Kadushi’ ku semanalmente ta publiká riba e wèpsait di ‘Dossier Koninkrijksrelaties’ hasta ta papia di un ‘Coupe de Rouge’, ku ta nifiká un akshon repentino i desisivo den polítika ku ta resultá den un kambio di gobernashon ilegal òf ku forsa. Segun e kolumna, e atentado kontra nos estado di derecho no por keda deskartá meramente komo chansa di un par di mala mucha, pero un den nos Reino Hulandes konsiderá komo imposibel gòlpi di estado, ku e intenshon di degradá e diputadonan i gezaghèber na meremente marionetanan na un hilu.
E minister di asuntunan interior i relashonnan di Reino na tempu a keda alarmá i tabata na punto pa intervení i no por deskartá e posibilidat tampoko ku ya tin un lei den konsepto pa pone Boneiru bou di kuratela manera a hasi ku St. Eustatius na 2018. BONERIANO a bin komprondé ku a usa e momento adekuá pa avansá e kousa, konsiderando entrada di vários miembro nobo i nobato den e Konseho i Kolegio Ehekutivo no ta informá Konseho Insular debidamente i te ku resien no tabata publiká su desishonnan riba nan wèpsait. Pero e manera kon a kier a trese kambio tabata bai kontra lei i regla fundamental manera ankrá den nos WolBES i Finbes. Lo a prohibí Kolegio Ehekutivo di tuma sierto desishonnan promé ku Konseho Insular debatí i akordá kiko e desishon mester ta i komo tal lo a eliminá e sistema demokrátiko di dualismo por kompletu. Remarkabel ta e echo ku den tur esaki lo a duna e grifir ámplio mandato pa e mes por disidí ken por tuma na trabou na Konseho Insular, kier a dun’é un karchi di krédito i mas espantoso ta e echo ku kada frakshon lo bai haña mínimo 60.000 dòler na sosten finansiero pa aña i biahenan ku ta dura mas ku seis ora lo bai bira ‘business class’. BONERIANO a tira un bista serka e munisipio di Eindhoven na Hulanda ku tin 45 miembro den nan konseho i nan ta risibí 14.267.25 euro pa kada frakshon pa aña ku ta ekibalente na 15228.15 dòler pa aña, loke ta muchu mas ménos ku na Boneiru. Por papia libremente ku ta malgastá sèn di pueblo den Konseho Insular.
Bon chèns pa e komishon resien instalá di ouditoria hasi un investigashon profundo di mas aña den esaki. Miembronan ta Caryl Els, Jaques Heide komo presidente i sra. Rianda Sacré. Ku Demokrasia ta funshoná ainda na Boneiru ounke un tiki debil por keda dedusí ku na tempu e koalishon konsistiendo di UPB i MPB a realisá kiko ta pasando i a sali bai for di sala di reunion dia 21 di ougùstùs último i den e último reunion di Konseho Insular e votonan a empatá, pues no tabatin desishon. BONERIANO ta di opinion ku e koalishon tambe tin falta den esaki, dor di a permití e tópikonan subi agènda sin ku esakinan a kana e proseso adekuá i sin ku tabata tin aviso eksterno. Konosiendo e grifir, nan mester tabata sa ku no por laga e kosnan aki den su man, pero mester a buska konseho serka por ehèmpel e asosashon di munisipionan di Hulanda ku tin masha hopi modelonan di lei genériko riba e tópikonan aki ku simplemente por a keda adaptá pa nos isla.
Nos no por keda sin menshoná e gezaghèber interino, alabes presidente di Konseho Insular, ku tin e tarea di guardian di bon gobernashon i demokrasia. Kiko a pasa? BONERIANO ta kere ku awor si koalishon mester bai aktua fuertemente huntu ku gezaghèber interino pa establesé stabilidat demokrátiko den nos entidat públiko i pa no lubidá Kolegio Ehektivo, ku tambe tin un ròl hopi grandi den esaki. Nos ta kere ku mester kuminsá pa eliminá tur e komishonnan fiho den Konseho Insular i bin ku un komishon sentral. Mester kuminsá pa apuntá un grifir permanente i no laga e proseso di solisitashon den man di e aktual grifir interino. Si nos mes no hasi ‘schoonschip’, manera nan sa bisa na hulandes, anto Hulanda ta pará kla kaba pa manda tur diputado, gezaghèber i miembronan di Konseho Insular kas i tuma over. Ta esei nos ke?
