PHLIPSBURG – Un delegashon di Ministernan di hustisia di Kòrsou, Aruba i Sint Maarten, huntu ku e hefenan di kuerpo polisial, ofisialnan di polis i konseheronan, a konkluí un bishita di trabou produktivo na Repúblika di Sürnam di 23 pa 26 di ougùstùs. E bishita tabata organisá riba invitashon di Kenneth Amoksi, Minister di Hustisia i Polis di Sürnam. Durante un sena di bon biní ku e minister di hustisia di Sürnam, e evento a proveé un plataforma pa interakshon i diskushon entre e delegashon i nan partnernan Surinameño. E okashon a sirbi tambe pa atendé e signifikashon históriko entre e ministernan di hustisia di e kuater paisnan. E programa a inkluí bishita na e institutonan di kadena hudisial. A konkluí e bishitanan ku presentashonnan informativo dor di ekspertonan riba vários tereno.
E representantenan di Kòrsou, Aruba i Sint Maarten, a interkambiá ku ofisialnan Surinameño tokante koperashon di frontera, kombatí kriminalidat i relashon fuerte entre e paisnan. Mas aleu e delegashon tabatin e oportunidat di topa ku e presidente di Sürnam, Chandrikapersad Santokhi. Durante e enkuentro ku e presidente, a atendé e relashon estrecho entre e paisnan, huntu ku potensial koperashon kresiente. Minister Anna Richardson a ekspresá su satisfakshon pa resultá di e bishita di trabou, indikando ku su koleganan ta dispuesto pa kolaborá. El a nota ku e delegashon su bishita na e institutonan hudisial, a proveé bista balioso dentro di e koperashon akí. E bishita di trabou ta marka pasonan signifikante pa dilanti pa oumento di koperashon i esfuersonan huntu pa sigurá siguridat i hustisia den e region Karibense.
