KRALENDIJK — Sumamente lamentabel, kondenabel i asta infantil, esaki ta e promé pensamentu di MPB reakshonando riba deklarashon di lider polítiko di M21, Daisy Coffie, kaminda e ta ataká Diputado Hennyson Thielman, no riba su maneho, sino personalmente i asta ta sugirí ku e lo mester renunsiá.
MPB ta di opinion ku den e kaso akí ta hopi importante pa hasi algun pregunta krítiko. Na promé lugá mester puntra sí ta na su lugá pa atendé personalmente ku diputado Thielman pa ku e negoshi Hype Event Planner, ku ta riba nòmber di su kasá. Ademas mester puntra sí e negoshi mester di un pèrmit di konstrukshon si òf nò.
Interpretashon di lei
E pèrmit pa konstrukshon a keda pidí, pero a rechasá esaki. E rechaso ta basá riba sierto interpretashon di lei i regla ku un tènt no por keda pará un kaminda pa mas largu ku un periodo. Sí e periodo indiká pasa, mester bolbe pidi un pèrmit. Pa evitá ku kada bes mester renobá e pèrmit, a pidi un pèrmit di konstrukshon. Pero basá riba ku loke tin einan ta keda kategorisá komo un tènt, a nenga e pèrmit di konstrukshon i ku rason.
E pèrmit di evento por sierto ta keda bálido i ta kubri tur e aktividatnan. Esei ta nifiká ku no por papia di ningun ílegalidat den henter e asuntu.
MPB ta splika ku artíkulo 41b di e lei di munisipio i artíkulo 48 di WolBES, ta establesé ku un diputado di un munisipio i un diputado na Boneiru, no por desempeñá kualke funshon sekundario ku por perhudiká kumplimentu adekuá di e funshon di diputado. Artíkulo 48, insiso 2, ta preskribí ku un diputado mester mèldu su intenshon pa un funshon sekundario na Konseho Insular. Te asina leu no tin indikashon ku Diputado Thielman tin un funshon sekundario ku ta indeseabel. Sí esaki ta e kaso, anto Konseho Insular tin tur derecho pa atendé ku e diputado riba esaki.
Atake baho i sushi
Artíkulo 49 di WolBES, sinembargo ta preskribí ku un diputado mester deklará por eskrito na e representante di Reino, eksaktamente tur interes komersial i bienes ku e i su kasá tin, òf ta atministrá. Segun artíkulo 51 di WolBES, e representante di Reino tin e deber di tene tur kos sekreto i solamente por duna informashon òf deklarashon na e instansianan ku ta enkargá ku investigashon penal. No ta pòrnada ku e deklarashon menshoná ta bai pa e representante di Reino i mester keda sekreto, pues esaki ta netamente pa protehá un diputado kontra atakenan baho i sushi manera ta e kaso awor. Un diputado ta permití tin un interes komersial i ta normal ku e interesnan ta keda poné na un distansia, di forma ku e maneho di e negoshi òf e interes no ta den man di e diputado. Ku un interes komersial òf un negoshi, ta bini aserka asuntunan di pidimentu di pèrmit i obligashonnan di pagonan di impuesto, etc.
Infantil
MPB ta haña ta hopi infantil pa kulpa e diputado den e kuadro akí di un komportashon no étiko i ku el a ehersé influensia. Manera e kódigo di kondukta ta preskribí, Diputado Thielman tabata dispuesto pa kontestá e preguntanan den Konseho Insular tokante e interes komersial al kaso, kaminda atrobe mester enfatisá ku e no ta involukrá den e operashon diario di e negoshi. Pues debidamente el a demostrá di ta habrí i transparente, lokual ta permití Konseho Insular di tin un bista optimal i por husga e aktuashon di e diputado i e rasonamentu tras di esaki. E lider polítiko di M21 tur dia tin su boka yen ku nos mes hendenan mester haña oportunidat pa okupá puestonan haltu den nos komunidat.
Durante e selebrashon di Dia di Boneiru el a ekspresá masha bunita palabra ku mester krea un ambiente kaminda diferente kultura por floresé i mester tin rèspèt pa otro. Probablemente e tabatin e komunikado venenoso ya prepará kaba pa publiká esaki, pues tur su bunita palabranan tabata un farse. Segun dikshonario esun ku ta fingi otro di loke e realmente ta, ta keda kategorisá komo un hipókrita.
Polítiko aventurero
MPB no por spera otro di un buladó di kurá, ku e ta blas e asuntu for di tur proporshon. Ta hasi manera e diputado a aktua na un manera no íntegro, turesten ku a keda komprobá ku e diputado no a ni tuma ningun akshon ni tabatin influensia den e asuntu akí. Lamentablemente e interes general di e pueblo di Boneiru sí ta keda afektá profundamente, pasobra kandidatonan potensial pa bira diputado òf miembro di Konseho Insular, lo bai pensa dos tres biá pa skohe pa esaki. Mirando ku un sèt di aventurero polítiko ta daña nan nòmber i di nan famia i ta purba di destabilisá e komunidat Boneriano.
