WILLEMSTAD– Parlamento di Kòrsou a bini huntu den un Reunion Públiko pa sera Aña Parlamentario 2022-2023. Tabata un aña ku Parlamento a sigui elevá e órgano di mas haltu di estado. A introdusí diferente adaptashon, manera ‘Ora di Pregunta’ i ‘Interupshon’. Presidente di Parlamento señora Charetti America-Francisca, na final di e reunion, a duna un rekuento kon e komo Presidente a eksperensiá e aña legislativo 2022-2023 i a sera Aña Legislativo i a gradisí tur pa nan aporte na e totalidat. Manera ta kustumber, un dia promé ku apertura di e aña legislativo, Presidente di Parlamento señora Charetti America-Francisca, durante di e rueda di prensa, a duna un resúmen di e reunionnan ku a tuma lugá, i otro trabounan parlamentario. Alabes señora Charetti America-Francisca a duna un splikashon riba e prosesonan i kambionan ku ta na kaminda, pa Parlamento ta mas serka di Pueblo.
