ORANJESTAD — E carta cu Prome Minister di Corsou, Gilmar Pisas a dirigi na sr. Jaime Saleh relaciona cu su posicion honorabel di “Minister van Staat” di Corsou, a ser cuestiona formalmente pa hopi hende cu conoce e persona di Jaime Saleh. Den e propio carta di Premier Pisas, ta ser mustra cu Jaime Saleh a ocupa algun funcion top den e sector constitucional manera entre otro Presidente di Corte Comun di Husticia, e posicion di Gobernado di Antias Hulandes y pa despues di 10- 10-10, a ser nombra como ‘Minister van Staat’ di pais Corsou cu ta un posicion honorabel. Tambe tin cu agrega cu sr. Jaime Saleh despues di su periodo como Gobernador di Antias Hulandes, a ser nombra como Consehero di Cas Real bou di Reina Beatrix y ainda e ta sigui eherce e obligacion aki pa yiu di e ex Reina. Tabata Minister Plenipotenciario di Corsou na Den Haag kende a informa Premier Pisas cu e siman aki cu ta e siman di Prinsjesdag cu a inicia ayera y lo termina dia 22 di September, cu sr. Saleh den su calidad di Minister van Staat di Corsou, ta invitado na varios actividad oficial relaciona cu Prinsjesdag y tambe e tin cu atende un conferencia den cual lo trata e tema di ‘Levende Cultuur en een duurzame samenleving binnen het Koninkrijk.’ Prome Minister di Corsou no kier pa Saleh atende e ceremonianan na cual e ta invita como Minister van Staat indicando e “rol” cu e persona aki a hunga den ultimo desaroyonan relaciona cu e asunto di Ennia caminda doño di compania aki, a malversa casi un biyon di fondo di pensionadonan cliente di e compania. Jaime Saleh lo a fungi un periodo como comisario di e compania aki y awor Parlamento di Corsou a pidi informacion riba su participacion den henter e asunto aki, loke a pone Prome Minister Pisas hasta pone un ultimatum pa sr. Saleh.
Si pa dia 30 di September venidero cu ta aki dos siman Jaime Saleh no entrega por escrito su retiro como Minister van Staat di Corsou, gobierno di Pisas lo tuma medida necesario pa haci esaki. Henter e desaroyo aki a lanta hopi reaccion, sigur di esunnan cu conoce Jaime Saleh personalmente, cu a sigui su trayectorio di su carera impresionante, esunnan cu conoce su mentalidad y caracter, kende a ocupa posicionnan halto y clave den comunidad, pa awor wordo confronta c’un acusacion di Prome Minister cu ta mishi cu integridad di sr. Saleh. Sigur ora cu e ta ser haci pa un Prome Minister kende a dirigi un partido di MFK cu su fundado Schotte a ser condena y encarcela pa fraude cometi y tambe pa otro asuntonan fraudulento y kende a wordo prohibi di carga un funcion publico pa un periodo largo. Esey ta e cuna politico di Gilmar Pisas y awor cu su persona y su gobierno ta cuestionando integridad di un persona conoci pa su integridad, e ta causa iritacion y ta laga un sabor amargo atras. E podium publico riba cual sr. Jaime Saleh a para pa henter su carera profesional, e respet cu el a demostra den tur su obligacion riba tur nivel cu mester a carga den comunidad, ta haci dificil pa kere cu Premier Pisas lo por tin e trayectorio aki riba su nomber.
