KRALENDIJK — Djaluna último direktiva di Fundashon Alzheimer Bonaire a duna un presentashon tokante Demensia/ Alzheimer komo parti di nan programa di Luna Mundial di Alzheimer, na studiantenan di di dos aña di HZW i MSR MBO. Sra. Henna Winklaar, visepresidente i tambe Casemanager demensia i Sr. Gilberto Martis, un hóben profeshonal den kuido, tambe boluntario di Fundashon Alzheimer Bonaire a duna un presentashon for di nan mes eksperensia ku kliente, pero tambe nan eksperensia ku propio miembronan di famia. Durante e presentashon tabatin momentonan masha bunita, pero tambe kuentanan doloroso. E studiantenan di di dos aña MBO lo haña nan tambe ku diferente tipo di demensia e aña akí den e proyekto “Project adoptieouder”. Tantu studiantenan komo dosentenan tabata masha gradisidu pa e okashon ku a ofresé nan pa siña hopi tokante e.o. diferente tipo di demensia, símtomanan i tambe kon pa atendé ku demensia. Direktiva di Fundashon Alzheimer Bonaire ta deseá boluntarionan i habitantenan di Boneiru en general, for di awor un dushi Dia Mundial di Alzheimer, djaweps próksimo 21 di sèptèmber ku e tema pa e aña akí “Nunka muchu tempran, nunka muchu lat” Remediá riesgo awó !
