KRALENDIJK — Turista spesialmente ku ta bishitá Boneiru ku barku krusero, tin masha gana di wak yuana. Solamente e yuana dilanti Aeropuerto Flamingo ku ta esun mas grandi riba e isla, nan por mira. Nan deseo ta pa mira i asta mishi ku yuana, ta un alegria grandi pa nan. Un persona ku ta kore ku turista den bùs momentu tin barku ku turista, sa i ta komprondé bon kiko esaki ta nifiká. E turista ta masha entusiasmá pa mira na promé lugá flamingo, despues kabritu, buriku, lora i yuana. Esaki ta e pregunta ku tur paseo e turista ta hasi. Ta bestianan ku el a tende ku tin riba e isla i e tei pa mira nan.
Masha yuana tin na Boneiru, kasi tur kaminda. No mester bai un sitio spesial pa mira nan. Sinembargo durante un paseo ku e turista den bùs, sea parti sùit òf nort di e isla, kasi no ta topa yuana. Ta sinti ku nan tin hopi gana di mira e yuana na Boneiru. Momentu nan mira un flamingo, buriku i kabritu, ku ta poko mas fásil pa mira riba e isla kantu di kaminda, un shofùr ku ta manehá bùs òf taksista por bisa kon kontentu e turista ta bira. Ta interesante òf asta importante pa krea un manera pa turista, pero tambe e hende lokal, por mira i mishi ku yuana. Anto sí tin hende ke hasi un negoshi fásil i simpel, kria 2 òf 3 yuana, kuminsá for di djudju, anto siña nan ku hende por mishi ku nan, tene nan i saka potrèt ku nan.
Tambe siña e yuana pa drumi riba lomba òf skouder di un hende. Ta loke ku ta sosodé na Kòrsou i Aruba. Un proyekto asina por gana 100 dòler trankil riba un dia, sin molestiá. Pensa riba dje, mas bien ehekut’é. No sinta wak un estranhero biba na Boneiru hasié pa nos kuminsá kritik’é. Nos mes por. Ban pe.
