KRALENDIJK – “Un Palu Grandi a kai ku morto djaluna último ku morto di Narsiso (Pachicho) Thodé. Nos nèstòr e maestro di tènis a bai sosegá.” Esaki Robby Domacassé, un dje hopi alumnonan di Pachicho den deporte di tènis, a skirbi relashoná ku morto di Thodé. Pero Pachicho tabata mas ku esei. E tabata un persona rekto i korekto den su trabou i tambe komo hende. Narisisio Fransisco Thodé a nase dia 29 di yanüari 1932 na Boneiru. Ta un famia original di Antriol, pero meskos ku diferente di su rumannan bibá den área di Playa Pariba. Pachicho a bishitá St. Dominicusschool i despues di skol a drenta proseso laboral, asosiá semper na kompanianan di Lodewijk D. (LD) Gerrharts.
HMK
Durante 35 aña Pachicho a traha na spesialmente e kompania HMK (Handelmaatschapiij Kralendijk), e divishon ku tabata atendé ku distribushon di kombustibel riba e isla aki. Manera su susesor Elvis Martinus a bisa BONERIANO: “Pachicho tabata mas ku solamente enkargá ku un pòmp di gasolin. E tabatin maneho di henter un operashon bou di dje. No lubidá ku HMK tabata enkargá ku bòter di gas di kushiná, gasòil, gasolin i kerosin rònt Boneiru. Asta bòter di oksígeno nos tababata entregá. Esta agente di Curoil i CUZUFA. Pachicho komo hefe di e operashon aki mester a karga un responsabilidat grandi. Nada por a bai robes. P’esei tambe e tabata stret, rekto i korekto den su trabou. E no tabata hasi wega ora ku tabata trata trabou.”
Deporte
Pashon di Pachicho tabata deporte di tènis. El a bira un tenista temibel rònt Antia Hulandes. El a gana hopi tenista famá di islanan ruman. Na Boneiru t’e tabata maestro den e deporte aki. Robby Domacassé ta splika: “Pachicho a mustra nos kiko ta rèspèt riba i pafó di kancha. El a siña nos ku bo mester tin disiplina, ku tènis tin ganamentu i mas tantu pèrdèmentu, pero semper tin kompetensia. Ku si bo ke ta bon, trein tur dia.” Mas aleu, segun Domacassé, Pachicho a bisa semper ku tènis i deporte ta e mihó remedi pa salú di hende. “Pa mas ku 60 aña Pachicho a karga i dirigí tènis di Boneiru komo hungadó i dirigente den klup komo bònt di e deporte aki. El a yuda i siña diferente hóben i adulto kon pa hunga tènis. Tambe el a kompetí interinsular.
Loyalidat
Na òktober 1989 Narsiso Thodé a baha ku penshun. Den kantina di Bonaire Trading Company na Kaya LD Gerharts a tuma su despedida. Na e momentu ei Thodé tabatin 35 aña komo e persona responsabel pa distrbushon di diuferente tipo di kombustibel na Boneiru. Presidente-direktor di e kompania BTC, Hugo Gerharts, a elogiá su empleado ku a baha ku penshun. “Pachicho a kuminsá traha na nos kompania for di tempu ku mi tabata sintá den banki di skol.” Susesor di Pachicho den e funshon aki a bira Elvis Martinus. Papiando ku Elvis ayera, ela a bisa ku Pachicho tabata su modelo den trabou. Hopi el a siña serka Pachicho, spesialmente disiplina, puntualidat i karga responsabilidat. Elvis: “Nunka mi a mira Pachicho yega trabou lat òf keda kas pa motibu di enfermedat. Malu òf bon, semper e tabata na su boka di trabou.” Gerharts a bisa na despedida di Pachicho for di e kompania: “Pachicho tabata prueba, biba di loyalidat.”
Maestro
Masoménos na 1970 Pachicho a kuminsá dediká atenshon pa siña mucha i hóbennan boneriano hunga tènis. Un di su alumnonan, ku tambe a bira un dje mihó tenistanan di Boneiru i asta Antia tabata Rudy Domacassé. Na 1972, luna di desèmber, tabatin un torneo di tènis pa Kopa Statüt. Na sierto momentu e mester a hunga kontra Rudy, kende a gana Pachicho den un wega yen di tenshon. Alumno a gana mestro. Korant Amigoe a skirbi: “De finale heren-A was alleszins het aanzien waard. Hiervoor hadden zich geplaatst nestor Narcisio Thodé tegen de jeugdige veelbelovende Rudy Domacassé. In de eerste set liep de stand gelijk op. Bij de stand 6-6 werd het tic break-systeem toegepast. Rudy kwam het eerst aan de benodigde vijf punten waardoor de score 7-6 in zijn voordeel werd. In de tweede set kwam Narcisio bijna niet meer aan bod. Eén game wist hij nog op zijn naam te brengen, de overige zes kwamen op naam van Rudy. Met keiharde smashes en volleys wist hij Thodé volledig uit het lood te brengen.
Insidente
Na novèmber 1983 tabatin un insidente interesante den bida di Pachicho. Nos ta sita e korant Extra: “Polis a haña informashon ku un boto lo a pèrdè riba laman ku dos persona na bordo. E dos personanan aki a sali bai piska 3’or djabièrnè atardi, pero ora tabata birando lat i nan no tabatin fin di yega, nan famianan a notifiká outoridatnan polisial. A sigui un akshon di búskeda, kordiná pa Majoor Brunken. A dirigi un patruya pa Saliña kaminda nan a nota un lus riba laman, prosedente di un boto ku aparente problema. “ Instantenan despues e boto di lots BUBI a sali pa Saliña pa ousilia e boto den problema. E tripulantenan tabata e komersiante Jossy Boekhoudt i Pachicho Thodé. Boekhoudt, kende tabata doño dje boto, a mustra ku ora nan kier regresá motor di e boto no tabata ke start. E kombinashon ta mustra yegada di e dos personanan aki na e waf di Piska dén oranan di diasabra marduga, despnov. 1983
