KRALENDIJK — Tourism Corporation Bonaire (TCB) a organisá su di tres ‘Bonaire Tourism Summit’ anual dianan 27 i 28 di sèptèmber na Courtyard by Marriott. E aña akí e kumbre a tuma lugá dos dia. Durante e promé dia di e kumbre, TCB a kompartí su vishon, akshonnan i strategia, pa desaroyo di turismo, pa medio di un presentashon di parti di Miles Mercera, direktor di TCB. TCB a presentá un bista general di e situashon aktual na Boneiru, e resultadonan i e planifikashon pa aña 2024. Meta di TCB pa aña 2023 ta pa logra un kantidat di 170.000 bishitante di estadia. For di yanüari te ougùstùs, Boneiru a yama bon biní na 113.000 bishitante di estadia. Na e momentu akí e porsentahe di bishitante ku ta bini bèk ta 55%. Dunn&Co, e ofisina di publisidat i partner di TCB, a kompartí vários aktualisashon tokante nan trabou aktual i un bista adelantá di loke ta bai pasa na aña 2024. Nan a kuminsá ku un resúmen kompleto di e aktivashon di Earthonauts, ku a tuma lugá den e di kuater kuartal di aña 2022. Despues di esei a papia tokante e aktivashon di ‘multi-city 2023’, Flash Flamboyance, kaminda nan a hiba e bunitesa fantástiko di Boneiru su flamingo na New York City, Toronto i Miami, pa brinda e merkadonan importante akí algu di e sabor boneriano i pa papia ku nan tokante bunitesa di nos isla.
A terminá nan presentashon ku un bista mas profundo di e grupo di enfoke di Global Citizen, un aktualisashon tokante kreatividat di kampaña, asosiashonnan publisitario, tendensianan di merkadeo ku ta influensiá turismo i kon na aña 2024 duna bida na e enfoke pa e aña di preservashon di nos tesoronan skondí. Diamond Public Relations a presentá un bista general di e esfuersonan ku a ehekutá relashoná ku medionan di komunikashon i konsientisashon na bienestar di e destinashon pa aña 2023. E tim a kompartí resultado di e inisiativanan, entre otro biahe di prensa i bishitanan individual di medionan di komunikashon, presentashonnan,eventonan pa medionan di komunikashon i tambe lansamentu di e ‘podcast’ nobo di seis episodio na Boneiru i e kampaña resien di ‘TikTok Island Hopping’. Komo resultado di nan esfuersonan di relashonnan públiko, for di yanüari te ku ougùstùs nan a alkansá mas ku 189 mion impreshon den medionan di komunikashon na Nort Amérika i 59 mion na Europa. Diamond PR a papia tambe tokante e tendensianan di biahe binidero pa aña 2024. Riba e di dos dia, Diputado di Desaroyo Ekonómiko i Turismo, Jolinda Craane, a pone énfasis riba importansia di esfuerso kolektivo i kresementu kompartí.
E diputado a duna atenshon mas profundo na e prioridatnan mas importante di Entidat Públiko Boneiru, entre otro stimulashon di embolbimentu lokal, integrashon di hasimentu di negoshi den un forma sosialmente responsabel den empresanan, promoshon di e inisiativa di ‘Blue Destination’, implementashon di adaptashon pa loke ta trata impuesto di turista i sigurá finansiamentu struktural pa TCB. Esaki ta reflehá e kompromiso ku un futuro kolaborativo i sostenibel. Kia-San, un representante di Ofisina di Haf di Boneiru, a kompartí un bista general di e prestashonnan di bishitantenan krusero. Segun ekspektativa na aña 2023 ta spera 187 barku krusero, kaminda lo yama bon biní na mas òf ménos 400.000 bishitante. Tambe el a suprayá e nesesidat di un maneho adekuá di e industria di turismo krusero. Kia-San a introdusí algun atkisishon eksitante, manera Explora I i el a duna splikashon tokante e ‘One Ship Policy’ pa un maneho responsabel di e industria krusero. Komo parti di ‘Bonaire Tourism Summit’, TCB a organisá tambe seshonnan interaktivo den grupo chikitu, kaminda sektor privá a partisipá i a duna nan aporte pa inisiativanan di merkadeo pa Boneiru pa aña 2024. Gustosamente TCB ke gradisí tur partner ku e aña akí a asistí na ‘Bonaire Tourism Summit’ anual.
