KRALENDIJK — Durante un seri di bishita ku a tuma lugá di 4 pa 6 di sèptèmber, Rene Van Nes, Embahador di Union Oropeo pa Guyana i Sürnam i responsabel pa e paisnan i teritorionan ultramar, OCT, Aruba, Boneiru, Kòrsou, Saba, Sint Eustatius, Sint Maarten i Sint Barths, a fortifiká e relashonnan entre Union Europeo i Boneiru. E seri di bishita akí ku Entidat Públiko Boneiru a organisá, ku sosten di International Desk Bonaire (IDB), a tira lus riba asuntunan importante i riba posibilidatnan pa e isla. Dia 4 di sèptèmber e representante di Union Europeo tabata di bishita na e planta di purifikashon di awa di WEB. Durante e bishita na e planta di purifikashon di awa, a tene algun presentashon tokante purifikashon di awa, e vishon di WEB i resultado di e sosten ku Union Europeo ta duna na WEB. Dia 5 di sèptèmber, van Nes a topa ku Kolegio Ehekutivo di Boneiru. E kòmbersashonnan a enfoká riba e kolaborashon entre Union Europeo i Boneiru, kolaborashon ku otro islanan i uso di fondonan Europeo. Riba e mesun dia, van Nes a hasi un bishita serka e enviado spesial, Edison Rijna, kaminda e deliberashonnan a bai tokante e futuro kolaborashon, rekoudashon di fondo Europeo pa Boneiru i e proyektonan ku ya kaba ta haña sosten di Union Europeo. Van Nes a bishitá tambe e palunan di mangel di Lac, kaminda el a ekspresá su apresio pa STINAPA su dedikashon na konservashon di naturalesa. Akí e representante a haña sa mas tokante e proyekto Lac pa semper, ku ta enfoká riba rekreashon sostenibel, rekuperashon di koral i kama di yerba di laman, mihó mantenshon di lei i edukashon di komunidat. Ehekushon di e proyekto ta den kolaborashon ku e programa di ‘Resilience, Sustainable Energy, and Marine Biodiversity’ (RESEMBID) i ta kontribuí na preservashon di Lac i e palunan di mangel ku ta rondon’é. Van Nes a hasi tambe un paseo informativo den boto ku e rangernan di STINAPA, kaminda el a eksplorá e diferente tiponan di mondi di palu di mangel i kaminda el a mira e esfuersonan ku STINAPA ta hasi pa koba kanal nobo. E bishita akí a enfatisá e importansia di preservashon di Boneiru su naturalesa i e esfuerso ku organisashonnan manera STINAPA ta hasi pa logra esaki ku sosten di Union Europeo. Loke tambe a destaká, ta e kolaborashon entre STINAPA i Entidat Públiko Boneiru, via IDB. E bishita a pone énfasis riba e kolaborashon entre Union Europeo i Boneiru i a suprayá e esfuersonan pa protekshon di medioambiente i naturalesa. Van Nes a enfatisá e disposishon di Union Europeo pa traha huntu i duna sosten na Boneiru i e otro islanan den region.
