Despues di hopi aña m’a topa ku Lupe Reyes. Huntu ku su yu Reinaldo Reyes el a bishitá nos na FuHiKuBo siman pasá. Di mes mi konosé Lupe pa hopi aña kaba, pero no di e tempu ku el a biba na Boneiru. E ta kuater aña mas bieu ku mi i é, komo mucha di Playa i ami di Den Stashi, práktikamente e tabata inalkansabel. Den e tempu ei no tabatin masha kontakto entre muchanan di Playa i di Antriol.
***
Mi kontaktonan ku Lupe ta na Kòrsou. El a rekordá mi ku hopi aña pasá el a otorgá mi un distinshon yamá Exda Award. I e tin rason. Tabata e promé distinshon importante ku m’a haña den mi bida, nèt despues ku m’a kuminsá ku e programa di televishon ‘Herensia di Siglo 20’ na TV-11. Lupe awor tin e edat ku e por a bini den Herensia. Mi a invit’é. El a primintí ku otro luna e ta bèk na Boneiru i e lo laga mi entrevist’é. Pues un tiki pasenshi.
***
Nos mundu a para bira manera un bòm bon kargá ku por eksplotá un ora pa otro. Ku atenshon i preokupashon mi ta sigui e desaroyonan riba tur frontera. Mi ta sigui Rusia-Ukrania, China-Taiwan, Israel-Gaza-Palestina-Lebanon-Iran-Yemen, tambe loke ta sosodiendo pegá ku nos aki, Venezuela, na unda Nicolas Maduro a kombertí su mes den un diktador temibel, ku te asta ke detené i sera e dos lidernan di oposishon. Tristu loke ta pasando na nos pais besiña.
***
Miéntras nos ta preokupá aki na Boneiru ku buraku den kaminda, un pera di lus ku a kima riba kaya, sushi tirá den mondi (loke enbèrdat ta tristu) òf otro kos, mundu ta enfrentando problema i desafionan muchu mas grandi. Tur mainta ku mi lanta mi ta sende televishon i bai NPO-1 pa informá mi mes kiko a pasa den anochi. Siman pasá tabata di remate, ku diferente atake i atentado mortal riba lidernan di Hamas. Ta opvio ku e kos no ta keda einan. Por spera ku ta bini akshonnan di vengansa kontra Israel. Ta hopi tenshon tin den mundu. I no ta diskutí riba loke sabínan ta yama ‘peanots’. Te asta a kuminsá papia di un Terser Guera Mundial, ku lo ta devastador pa e planeta aki i su habitantenan.
***
E aña aki mi no a sali for di Boneiru. Mi ta na kas i ta sinti mi na kas. Bon mirá mi no ke sali for di Boneiru. Pero ta momentu pa kuminsá pensa riba biahenan pa Kòrsou i Aruba. E stòk di programa ku hende di Kòrsou a kaba siman pasá. E último Herensia di Kòrsou tabata ku Hugo Zimmerman. Di Aruba tin tres ainda pa pasa. Pues tin ku pensa den direkshon di Aruba tambe. Di Boneiru sí nos tin bon stòk.
***
—
FOTO
Siman pasá huntu ku Lupe i su yu hòmber Reinaldo Reyes.
—
FOTO
Nicolas Maduro a kombertí su mes den un temibel diktador.
