KRALENDIJK –– Bo salú oral ta mas importante ku bo por ta realisá. E no solamente ta afektá e estado di bo djentenan i ensia, pero tambe tin un impakto signifikante riba bo salú general. Komprenshon di e konekshon entre bo salú oral i e bienestar di bo kurpa, ta esensial pa mantené un estilo di bida saludabel.
Vínkulo entre salú oral i salú general
E boka, meskos ku otro partinan di kurpa, ta yen di bakteria. Miéntras ku mayoria di e bakterianan akí ta inofensivo, e boka ta sirbi komo un porta di entrada pa e trakto digestivo i respiratorio. Esaki ta nifiká ku bou di sierto kondishonnan, bakteria oral por kontribuí na malesanan den otro partinan di kurpa.
Bon higiena oral, inkluyendo skeiru i uza hilu dental regularmente, generalmente ta mantené e bakterianan akí bou kontròl. Sinembargo, negligensia di kuido oral por hiba na un oumento den bakteria dañino, resultando den malesa di ensia i potensialmente problemanan di salú mas severo.
Ademas, sierto remedi por redusí e produkshon di skupi, ku ta hunga un ròl krusial den salú oral. Skupi ta yuda laba partíkulanan di kuminda i neutralisá ásidonan produsí pa bakteria den boka, preveniendo e kresementu di bakterianan dañino. Remedi manera dekongestivo, antihistamine, kalmante pa doló, diuretiko i antidepresivo, por seda boka, hibando na un desekilibrio ku ta fomentá e plamamentu di bakteria.
Inflamashon i infekshon den boka, spesialmente den e forma di malesa severo di ensia konosí komo periodontitis, a keda konektá na otro kondishonnan di salú.
Algun malesa, inkluyendo diabétis i HIV/AIDS, por baha e kapasidat di e kurpa pa bringa kontra infekshon, ku na su turno por eksaserbá problemanan di salú oral.
Kondishonnan di salú konektá na salú oral
Salú oral ta asosiá ku vários kondishon di salú, inkluyendo:
- Endocarditis: Esaki ta un infekshon straño, pero potensialmente fatal di e kapa interno di e kambernan òf klèpnan di kurason. E ta sosodé ora bakteria for di otro partinan di kurpa, manera e boka, ta drenta e sirkulashon di sanger i pega na áreanan den e kurason.
- Malesa kardiovaskular: Investigashon ta sugirí ku inflamashon i infekshonnan kousá pa bakteria oral, por ta ligá na malesa di kurason, arterianan pegá i derame serebral.
- Komplikashonnan di embaraso i parto: Malesa di ensia, partikularmente periodontitis, a keda asosiá ku nasementu prematuro i peso abou na nasementu den beibinan.
- Neumonia: Sierto bakteria oral por biaha pa e pulmonnan, hibando na neumonia i otro malesanan respiratorio.
Sierto kondishonnan di salú tambe por impaktá salú oral negativamente:
- Diabétis: Hendenan ku diabétis ta mas propenso na malesa di ensia debí na e kapasidat redusí di nan kurpa pa bringa kontra infekshonnan. Ademas, malesa di ensia por hasié mas difísil pa kontrolá nivelnan di suku den sanger. Kuidadó dental regular a keda mustrá pa mehorá maneho di diabétis.
- HIV/AIDS: Problemanan di salú oral, manera heridanan doloroso den boka konosí komo legionnan mukosal, ta mas komun den individuonan ku HIV/AIDS.
- Kanser: Vários kanser, inkluyendo esnan di boka, trakto gastrointestinal, pulmonnan, pechu, prostat i utero, a keda ligá na malesa di ensia.
- Malesa di alzheimer: Segun malesa di alzheimer ta progresá, salú oral hopi biá ta baha tambe.
Protehá bo salú oral
Pa protehá bo salú oral i na su turno, bo bienestar general, sigui e guia akí:
- Skeiru bo djentenan por lo ménos dos biá pa dia pa dos minüt usando un skeiru di djente di serda suave i pasta di djente ku fluoruro. No lubidá di skeiru bo lenga.
- Limpia entre bo djentenan diariamente uzando hilu dental.
- Tene un dieta saludabel i limitá bo konsumo di kuminda i bebida ku hopi suku.
- Reemplaso bo skeiru di djente kada 3 pa 4 luna, òf mas tempran si e kuèrdènan gasta.
- Bishitá un dentista por lo ménos un biá pa aña pa kontròl i limpiesa. Bishitanan mas frekuente por ta nesesario dependiendo di bo salú oral.
- Evitá produktonan di tabako.
- Informá bo dentista tokante kualkier remedi ku bo ta tumando i kambionan den bo salú general, inkluyendo malesanan nobo, òf kondishonnan kontinuo manera diabétis.
Kuidando bo salú oral ta un paso klave den protehá bo salú general, pues hasi higiena oral un prioridat diario.
