Skirbi pa Ruthy”Lady Ruth” Vrieswijk-Bergen
—
Shonnan, boso sa cu e dianan ta pasa bay laga nos si nos no hasi bon uso di nan? Ya ta casi fin di Oktober pa nos drenta e luna di November y despues December pa e dushi celebracionnan di Pascu y fin di anja.
***
Nos tata Lucas Bergen a cumpli su di 92 anja di edad dia 18 di Oktober ultimo, den bon estado di salud disfrutando di su laptop keto bay. Nos a bini hunto den famia intimo pa celebre den un forma simpel pero hopi dushi y agradabel cu su yiunan y nietonan cu por a bin. Algun ta na Hulanda y algun tawata trahando, pero a tuma tempo pa a yama via video call pa a combersa largo cu nan Payo , nan welo stima.
***
Nos tin cu para y pone atencion y reflexiona riba fechanan asina bunita, bendiciona y importante. Nos grandinan ta nos historia di ayera pa nos recorda nan awe y mayan. Y ta di nos antepasadonan mi casa Johan, nos amigo Ernesto Rosenstand Jr. y Lady Ruth a combersa agradabelmente den Coffee House recientemente, temanan sumamente dushi y importante pa combersa di nan. Pero tambe algun puzzel y dolor di cabez ora corda na situacionnan un crenchi dificil y complica di antes. Pero cu si no ta pa nan , nos no ta na unda nos ta awe.
***
Ernesto Rosenstand e tata (dfm) ta e cabayero escritor Poeta, cu a pusha nos pa cuminsa skirbi, locual nos a hasi tambe basta anja pasa. Ernesto Jr. su yui homber guapo, un profeshonal correcto inspira cu hopi sabiduria, ta trahando riba proyectonan bunita di e bukinan na Papiamento di su tata. Pueblo keda pendiente . Y ta den Coffee House mi esposo Johan y ami, Ruthy, a bin topa atrobe cu e dushi pareha cu a marca e historia di mas dushi na Aruba, tempo cu Mr. Olindo Koolman tawata e gobernador di nos dushi isla.
***
Aruba a stima y keto bay ta stima e dushi pareha aki, cu Sra. Dora semper activo riba tereno caritativo, dunando tambe e muhenan atencion cu conseho y mas. Nos ta corda varios di su charlanan cu ela yega di hiba tambe den Misa. Un pareha ehemplar di amor, atencion, carino y hopi carismatico. No ta pa nada nos dushi hendenan di San Nicolas y pueblo ta yama Mr. Olindo Koolman “The people’s governor”. E dushi hende aki tawata serca di e curason di nos tur den pueblo, un representante digno di Cas Real.
***
Lady Ruth ta corda e bunita “Oranje Balnan” cu e y Johan a atende y tambe e biaha cu Ruthy a fungi como e Maestra di Ceremonia un dushi December cu e tema Pascu, un bunita celebracion di curason na e Cas di Gobernador di e tempo ey, Mr. Olindo Koolman. Danki Olindo y Dora, pa a laga atras boso “footprintsnan” bunita di tur locual boso a hasi pa Aruba den tur curason, cu te dia di awe, unda cu boso bay, ta wordo saluda como “E gobernador di pueblo”, “The people’s Governor”. You are the blessings!
***
Nos ta conclui nos relato di awe cu e deseo pa nos dushi Aruba keda calmo y trankil den e temporada di eleccion nos dilanti y pa laga pueblo vota y escoge nan gobierno den personanan cu tin e capacidad y curason pa traha pa pueblo. Pa tur cos cana nechi pa asina nos por drenta den e dushi ambiente di Pascu y fin di anja. Ban wak ki sorpresa Sinterklaas tin pa Aruba dia 6 di December. (Exito cu e campanyanan pa informa pueblo di boso programanan.).
Lo tin ripiticion di esnan cu a traha caba of cu varios di e nobonan cu tambe ta dispuesto pa traha.? Tin varios persona riba e listanan, capacita y cu tin hopi amor pa Aruba sigur !
Ta importante pa tur hende cu por vota, bay vota. Respeta opinion di otro, specialmente den famia ora tin parehanan y of yuinan cu cada un nan mesun pensamento den nan votacion.
***
Danki pa lesa nos relato di e siman ki, pasa un bon dia yen di sabiduria den nos alegria !
Un “bearhug” grandi diki gordo pa tur nos grandinan, nos hobennan y nos chikitinnan.
Ah si ! Pabien na Radio Galactica FM cu nan tremendo Marathon di Oldies 99.9 e siman cu ta tray lomba. Lady Ruth a goza tur nan dj nan, pero specialmente e programanan presenta pa Joe Hernandez, Jimmy Oduber, Alexia Werleman y Rowald Webb. Boso ta master !!!
