KRALENDIJK — Debí na e eksitoso proyekto piloto anteriormente e aña aki riba Dia di Rincon, Kuerpo Polisial Hulanda Karibense (KPCN) lo hasi uso di vigilansia di kámara durante aktividatnan di Regatta tambe. For di djárason 9 di òktober 2024 te ku djadumingu 13 di òktober 2024, lo usa kámaranan móbil pa vigilá diferente aktividat na okashon di Regatta. E vigilansia di kámara temporal aki lo ta parti di un evaluashon mas amplio di vigilansia ku kámara durante aktividatnan kaminda ta spera un públiko grandi, ku e meta pa garantisá seguridat i usa kapasidat polisial na un manera efisiente.
E resultadonan positivo di e proyekto piloto anteriormente e aña aki, na kua vigilansia di kamara a kontribuí na mantenshon di órden públiko, akshon polisial mas efisiente i pa e seguridat di públiko, a kondusí na kontinuashon di e inisiativa aki. Durante di Regatta, KPCN ta spera di bolbe haña un bista balioso tokante e efektividat di vigilansia di kámara na eventonan grandi.
Durante di Regatta lo instalá kámaranan di seguridat na vários sitio stratégiko. E meta di e medida aki no ta pa solamente mantené òrdu públiko, pero tambe pa mehorá e seguridat di bishitantenan i pa sostené polis i otro servisionan di emergensia pa reakshoná lihé riba insidentenan. Ku e kamaranan, polis por mira imágennan bibu (live) i tuma akshon mesora kaminda ta nesesario.
Pa e vigilansia di kámara ta hasi uso di 12 kámara na e siguiente sitionan:
– Vigilansia riba Kaya J.N.E. Craane na altura di Karels Beach Bar
– Vigilansia riba Kaya J.N.E. Craane na altura di Passangrahan
– Vigilansia riba Plasa Reina Wilhelmina na altura di e ofisina di Kolegio Ehekutivo
– Vigilansia riba Kaya Grandi na altura di Ofisina di Turismo (TCB)
– Vigilansia riba Plasa Niki Tromp (ántes Oranjeplein)
– Vigilansia riba Kaya Kòrsou
– Vigilansia riba Kaya L.D. Gerharts
– Vigilansia riba Kaya Nikiboko Sùit na rotònde Sùrnan di Roosendaal
– Vigilansia riba Kaya Nikiboko Sùit na rotònde Sabana
Lo prosesá e imágennan di kámara si tin mester di un bon ehekushon di tareanan polisial diario (Artíkulo 8 Wpg). Lo destruí e imágennan grabá despues di máksimo kuater siman. Si den kaso ku tin motibu konkreto dentro di kuater siman ku ta suponé ku e imágennan di kámara ta nesesario pa investigashon di un echo kastigabel, e ora ei por sigui hasi uso di e imágennan pa e meta aki. E términonan pa sigui hasi uso di esaki ta bálido e ora ei.
