**Djárason nos tabata na kaminda pa un reunion ku un kontratista grandi aki na Boneiru pa interkambiá i tuma oferta pa loke ta trata un proyekto. Tabata den kareda di kuartu pa dos di mèrdia. Dor ku mester a warda riba e otro koleganan, a disidí pa wak kiko tin asina na e radionan lokal. Komo tal nos a dal den e programa di ‘Tra’i Notisia’ di Norwin Willem i pa nos suerte òf mala suerte, e tabata tin tres miembro di Konseho Insular komo invitado.
Kisas e liña di preguntanan no tabata dirigí riba e trabou di e miembronan di Konseho Insular, pero mas tantu riba Gobièrnu di Boneiru. I ta akinan spantu a kuminsá drenta nos kurpa. Nan kontestanan tabata ful dirigí riba defendé e gobièrnu aktual i ningun momentu mi no a sinti ku e tres miembronan ei tabata representá mi persona, no solamente mi persona, pero hopi otro hende mas. E noshon serka nan tabata ousente ku nan ta representante di pueblo i nan tin ku kontrolá gobièrnu i sòru pa gobièrnu no desvia for di e interes general.
Hopi preokupante ta ku e miembronan en kuestion di Konseho Insular ta mustra komportashon di indoktrinashon. Miembronan di Konseho Insular mester kumpli ku nan tareanan independientemente i representá e interesnan di nan konstituyentenan. Si nan a keda indoktriná, nan por aktua prinsipalmente segun un sierto interes partidario, sin ta krítiko òf tene kuenta ku perspektivanan alternativo.
E konsehal ku a hòrta e asiento di partido bai kuné moralmente mirá i ku tin apénas 30 voto, a kometé e fayo stratégiko di bin huntu den e programa ku dos otro miembro di e tolda kòrá. Por mira esaki den konteksto di ta forma parti di un koalishon huntu, pero frankamente mirá tur hende por a ripará ku ta tres miembro di e tolda kòrá tabata sintá einan.
E presentadó di e programa nunka ta hasi hopi difísil i sèmper ta pone énfasis riba elementonan ku ta toka e interes di e pueblo i ku esaki mester keda bon komuniká ku pueblo. Di otro banda e programa tambe netamente ta pa pueblo atraves di e programa lansa nan preokupashonnan pa asina esaki yega serka e gobernantenan i representantenan di pueblo, ku na nan turno mester hasi algu ku esaki.
Pero kon ta hasi si miembronan di Konseho Insular ta indoktriná. Miembronan di konseho ta representá e pueblo di Boneiru. Ora ku indoktriná nan, nan no por representá e interesnan di e votadónan korektamente òf kompletamente mas, pasobra nan ta mará na e orientashon di e lider máksimo. Den un demokrasia ku ta funshoná bon, ta krusial pa representantenan di pueblo por forma nan mes opinion i tuma desishonnan ku ta mihó pa nan konstituyentenan, en bes di simplemente sigui loke ta wòrdu hinká den nan.
Independensia, pensamentu krítiko i debate habrí ta esensial pa garantisá esaki. Nos tur por a tuma nota kon e debate den Konseho Insular di e presupuesto 2025 a desaroyá. A yega asina leu ku e miembro di konseho insular ku a basha gobièrnu abou, a kritiká e veterano den polítika ku ta James Kroon pa medio di un komunikado di prensa, pa loke Kroon a trese dilanti den e reunion di Konseho Insular. Prueba palpabel di indoktrinashon.
Laga nos terminá kaminda nos a kuminsá ku ta e programa Tra’i Notisia. Ta puntra e konsehalnan nan opinion i kiko mester hasi pasobra pueblo ta reklamá ku e ekonomia ta stanká i nada no ta sosodé. En bes di kontestá kon ta bai mitigá e informashon akí, òf asta kon por establesé ku e ekonomia a kuminsá stanka, e konsehal di e tolda kòrá fuertemente i disididamente a trese dilanti ku esaki no ta bèrdat i ku esaki ta forma parti di un asina yamá ‘fluister campagne’. Papiando di indoktrinashon.
Durante e sita ku e kontratista grandi, sin ku nos a puntra, e representante di e kontratista kier sa ki dia nos proyekto ta ranka sali. El a splika mesora ku e mester pidi material djafó i mirando ku aktividatnan a baha drástikamente, e no kier pa materialnan keda pará hopi largu den su bodega. Ora nos a kaba einan nos a bai na un Chines pa freska un ratu. Akinan nos a keda aserká dor di un agente di ‘Real Estate’. El a keha ku kosnan ta mal stanká i invershonistanan a kuminsá pèrdè konfiansa den Boneiru. Dos ehèmpel klave i palpabel ku e ekonomia ta stanká, òf ta stankando. Anto ta papia di ‘fluister campagne’? Dios spar hende.
Te otro siman ku Dios ke.
