Nos a muda e rúbrika aki pa djaluna. Asina nos ta haña posibilidat pa analisá e loke pasa den siman mas mihó. I ta hopi kos di komentá i analisá tin. E último dos simannan aki tabatin e afèrnan di rosamentu di palu di mangel na Onima, tambe esun di krokodel, ku a konosé su morto despues di a tene Boneiru pa algun siman den su gara. Ta basta konsternashon i konmoshon e animal aki a kousa. Tambe el a laga artistanan demonstrá nan kreatividat. Nos a logra konta sigur 5 kantika ku a surgi lihé. Tambe diferente poster i skèch. Asina bo ta mira kon un kos simpel asina por krea tantu konsternashon. Asta e famoso kantante Jeon di Aruba a laga krokodel kishikí su kreatividat. Marco Marchena tambe a krea algun skèch humorístiko.
***
STINAPA mester a dil ku basta krítika relashoná ku kuementu di e krokodel den bahia di Lac . Hendenan sintá te na Hulanda a kuestioná kon STINAPA su rangernan a atendé e asuntu aki. E kos a bai manera el a bai. Un kos sí, semper e mihó kapitannan ta pará riba waf ta dirigí. I tur loke bo hasi ta mal, pero keda sin hasi ta malu. Na sierto momentu bo no sa kiko mas hasi…
***
Nos no ta kla ku STINAPA relashoná ku e desaster kousá den dam di Onima. STINAPA ta purba skapa su kurpa, bisando ku nan outoridat ta konserní solamente laman i Parke Nashonal Washington-Slagbai. E destrukshon na e palunan di mangel blanku den e dam aki, tambe pafó di e dam, pegá ku Boka di Onima, ta situá práktikamente na kosta. STINAPA mester asumí su responsabilidat i no kore bai skonde i usa argumentonan sin base. Loke a sosodé na Onima debidamente tin di aber ku e parke marino di Boneiru. Si esei no t’e kaso, sali splika ku nos no tin rason. Masha simpel!
***
No por ta asina ku ta yag riba piskadó i kunukeronan lokal, pasobra nan aktividatnan ta hasi daño, anto gobièrnu mes ta duna mal ehèmpel. Diputado Anjelica Cicilia tampoko no por sali ‘clear’ for di e afèr aki. E mester asumí su responsabilidat i no kore skonde tras di ku “nos lo bai planta e palunan di mangel bèk”. Meskos ku bo bisa ku bo ta lanta un hende ku bo a mata bèk for di morto. Loke a pasa ningun momentu no tabata mag sosodé. Punto!
***
Nos ta puntra nos mes tambe kiko Direktorado di Supervishon i Mantenshon di Lei di Entidat Públiko ta hasi den e asuntu aki? No ta normal ku nan ta hasi investigashon i entregá keho kontra gobièrnu di Entidat Públiko Boneiru? Nan lo hasi esaki? Si por ehèmpel ta aktua kontra un pober kunukero ta ku ta kap un palu di kuihi pa haña un par di staka pa sera su kunuku òf pa kima karbon, nos ta haña ku nan mester aktua tambe kontra e mesun gobièrnu pa kua nan ta traha! Òf nò? Lei pa un, lei pa tur.
***
***
Nos ta konstatá kaba den e kolumna aki ku oposishon ta suak. Ningun miembro di Konseho Insular, ku eksepshon di Daisy Coffie, ta prepará nan mes manera debe ser. Nos ta ripití ku esun na kabes den e Top 9 aki, komo esun mas suak, ta Cyrill Vrolijk. Ta realmente un bèrgwensa. Seguidamente ta bini Humphrey Wout jr., pero mester tene kuenta ku e ta relativamente nobo den Konseho Insular. Vrolijk supuestamente mester tin e eksperensia kaba pa por hasi un trabou na nivel den Konseho Insular. Na di tres lugá ta sigui Benito Dirksz riba e Top Suak aki. Ta un persona ku tabata diputado i mester por hiba debatenan mas na nivel.
***
Rolanda Hellburg-Makaai ta hasiendo su bèst, pero e mester ta mas krítiko kontra su mes gobièrnu. No para gaba kolegio ehekutivo so. Ser krítiko. Ta pueblo bo ta representá. No Demokrat òf lider di partido. Daisy tambe ta sostené e koalishon aktual, pero e ta krítiko kontra e tres diputadonan, anke nos ta kere ku e tin manera miedu di lider di Demokrat Clark Abraham. El a demonstrá esaki bon kla ora ku el a bini ku e moshon pa vota pa mas fondo pa TCB. E no a protestá riba e forma ku diputado Clark Abraham a reakshoná riba e moshon aki. Daisy mester realisá ku no ta é mester tin miedu di Clark. Al kontrario! Ta Clark mester tin miedu di dje!
***
Na e momentu aki bo ta sinti falta di un persona manera Robby Beukenboom den Konseho Insular. Ku Robby awóraki komo konsehal no ta sobra masha di e koalishon aki. Bo no tin un konsehal na e momentu aki ku ta yega ni na e pia sushi di Robby Beukenboom.
