Awor, por lo pronto, mi ta mantené mi mes na solamente un ‘DEN PASO DI BÒI’ pa siman. No pasobra no tin ko’i skirbi, sino solamente pasobra mi ke sakrifiká mi espasio pa artíkulonan interesante i importante ku mi ke kompartí ku boso. Pasobra, kere òf laga, BONERIANO a bira chikí pa e kantidat grandi di notisia ku tin. Fásilmente e korant aki por sali ku 24 página, pero mester tene kuenta ku aspektonan finansiero. No ta sin mas bo ta bai di 20 pa 24 página. E ta trese gastu kuné, tantu pa imprimí komo transporte di Kòrsou pa Boneiru.
***
Ta bon pa splika kon e korant aki ta bira realidat. Nos tin un kompania lokal, Bonaire Communication Services N.V. (BCS), ku ta saka BONERIANO. Tambe nos tin representashon di Extra na Boneiru. BONERIANO a nase for di Extra den tempu di Covid. Otro aña aprel BONERIANO ta kumpli su promé lustro. Nos ta imprimí BONERIANO na Drukkerij De Stad, na unda ta imprimí tambe Extra, Vigilante, Nobo i ántes La Prensa, Bala i mas korant ku no ta eksistí mas.
***
BONERIANO tin un redakshon dirigí pa Nathaly Evertsz, kasá ku Ibi di Kunuku Bieu. Ibi ta mi famia basta yegá. Mi tata ta primu di su wela Ursula (Chula) Evertsz. Otro miembro di redakshon ta mi ruman Papi, ademas Edson (Fittipaldi) Pietersz. Mi tambe t’ei, pero ménos presente manera ántes. Mi ta den ròl di konsehero.
***
Kasi tur mainta Nathaly ku mi ta komuniká ku otro tokante loke ta biba den komunidat, tambe kiko lo bira kontenido di e korant di siguiente dia. E ta manehá redakshon di BONERIANO. E ta ku nos for di kuminsamentu di BONERIANO, den e promé tempu komo ‘studiante’ serka Jean Mentens (Ret Karibense/NTR) ku mi. Desde aña pasá e ta hefe di redakshon.
***
Banda di produsí artíkulo pa BONERIANO, tin mas kos ta sosodé promé ku e korant aki yega den bo man. Mester traha layout. Maya Beaumont ta enkargá ku e trabou aki. Mucha di Rincon, nietu di e legendario Bubu Beaumont. Den pasado mi mes por a traha layout. Papi tambe. Pa mi ta e trabou di mas dushi na un korant, kon hinka e artíkulonan den página. E ta traha un PDF di e korant aki, ora e ta kla e ta manda esaki Drukkerij De Stad. Nan ta imprimí BONERIANO promé ku 12or di anochi. Ku e promé buelo di Dividivi e ta yega Boneiru mainta tempran.
***
E persona mas importante den BONERIANO ta Shirley Martis. E ta direktor di BCS. E ta manehá e korant aki i tambe Extra. No lubidá partidónan di korant Elsa Martis i Crusita. Pues ta muhé ta manda mundu den BONERIANO.
***
Un pregunta interesante ta kuantu tempu mas korant di papel lo keda eksistí. Mi ta kòrda kla kon na prinsipio di e siglo aki, ora ku Internèt a kuminsá kue plasa, ekspertonan a pronostiká ku pa aña 2020 lo no tin korant di papel mas. Tur kos lo a bira digital. Pero te ainda tin korant di papel. Banda di BONERIANO, tin tambe na Boneiru e korant bi-semanal ‘The Bonaire Reporter’. E tambe t’ei ketu bai. Un bon korant. Mi ta mirando ku BONERIANO i ‘The Bonaire Reporter’ lo bai den historia komo “de laatste van de Mohicanen”.
***
Mi amiga di semper drs. Morela Sterling ta bèk ku su kolumna den BONERIANO. Den pasado el a skirbi e kolumna ‘ESTA DUSHI BONEIRU TA’. Awor nòmber di su kolumna ta simplemente ‘Morela’. Mi konosé Morela sigur pa 30 aña, si no ta mas. Nos sa diskutí pisá tin biá riba sierto tópikonan. E ke splikashon pa tur kos, anto rabia ora ku esaki no ta sosodé. E ta ‘dushi hende’ sí. E ta yamami Boris.
***
Ayera Sebel, e kolumnista di mas yòn na BONERIANO, a kumpli 24 aña di edat. Ta mi yu di mas chikitu, studiando aktualmente pa su segundo título di ‘meester’ na Universiteit van Amsterdam. Pabien!
