KRALENDIJK – Dam di Mentor tambe a kuminsá kue awa despues ku a drech’é algun luna pasá den kuadro di e proyekto di rehabilitashon di dam, tanki i roinan na Boneiru. Despues di e yobidanan resien ya por nota ku e dam aki ta yenando ku awa.
Bon mirá e dam di Mentor ta konsistí di vários sekshon. Ta trata di damnan originalmente bon konstruí, hasiendo uso tin biá di betòn, tambe ku botadó. Probablemente betòn produsí na Mentor mes, kaminda tabatin un fábrika di blòki.
E dam aki ta esun di mas grandi den e área di Nort di Saliña i e parti nort di Antriol. Doño di Mentor, Cor Vis, tabatin kustumber di nabegá den e dam aki ku un boto di rema ántes.
Manera ta konosí, gobièrnu a anunsiá algun tempu pasá ku nan ke kumpra e tereno grandi di Mentor. Lo destiná e tereno pa traha kas, pero manteniendo e dam enorme aki den su estado original.
E dam di Mentor ta un habitat importante pa paranan di awa, manera patu i asta flamingo.
