KRALENDIJK– Wikènt ku a pasa tabata karnaval hubenil na Rincon i Playa. Durante di e marchanan, a kontrolá tur shofùr riba uzo di alkohòl i un reibeweis bálido basá riba e kategoria di e vehíkulo ku bo ta manehá. Ambos dia tur shofùr a pasa e tèst di supla riba konsumo di alkohòl ku éksito. Durante e kòntròl na Rincon, a resultá ku kuater shofùr no tabatin e reibeweis korekto. E shofùrnan aki mester a baha miéntras e gruponan a sòru pa un shofùr ku e reibeweis nesesario. Mas despues un di e shofùrnan por a mustra e reibeweis korekto i por a djòin e marcha bek. Su siguiente dia na Playa, tur kos a kana korekto durante
di e kòntròl.
Por a konstatá tambe ku durante marchanan hubenil, no tur persona tabata konsiente di e importansia pa no para tras di barikada na sitionan stratégiko, habri barikada sin outorisashon i no bebe den glas òf bòter. Polis a hala atenshon di algun establesimentu na Rincon i Playa riba benta di bebida den bòter òf glas. KPCN ta bolbe hasi apelashon na outomobilistanan pa no habri barikada i tampoko stashoná bo outo tras di barikada.
Esaki por tin komo konsekuensia ku e kaya no ta aksesibel den kaso di emergensia. Durante e marchanan benidero, lo intensivá e kòntròlnan i lo tou vehíkulonan stashoná tras di barikada. E gastunan di ‘takelwagen’ lo ta riba kosto di e doño di e vehíkulo. Ta rekomendá pa gruponan tin dos shofùr ku e reibeweis adekuá pa si akaso e promé shofùr bira malu òf si e mester bai baño durante marcha, e marcha no stanka. Esaki no ta algu ku ta kontrolá riba dje. Si lo kontrolá si e shofùr tin e reibeweis nesesario ku ta B/E pa por ehèmpel karosa chikitu ‘aanhangwagen’ i C/E pa trèker ku ‘trailer’. Pues den ámbos kaso mester tin reibeweis kategoria (E). Sinembargo kada shofùr ta keda responsabel pa kumpli ku e lei stipulá pa manehá riba karetera públiko. Esei ta inkluí entre otro ta den poseshon di e reibeweis nesesario pa manehá e tipo di vehíkulo partisipante i tambe pa no konsumí alkohòl miéntras ta manehá. Hasiendo e kòntròl riba e kategorianan di reibeweis menshoná, KPCN ta enforsá lei pa asina mantené e seguridat di tantu partisipante komo públiko presente durante e marcha di karnaval. E seguridat di un i tur ta keda nos prioridat durante e periodo di karnaval tambe. KPCN ta bon prepará i lo tin sufisiente agente polisial tantu na pia, den outo, riba baiskel i riba skuter i lo intensivá e kòntròl na sitionan stratégiko i ku ta hopi bishitá. Polis lo aktua di manera estrikto kontra personanan ku ta forma molèster pa otro i ku no ta sigui òrdu di outoridat. Laga nos kada un mantené nos mes na kada regla di seguridat, gosa sanamente i duna oido na òrdu di polis pa asina nos por selebrá karnaval 50 na un manera responsabel i seif. Kuerpo Polisial Hulanda Karibense ta deseá un i tur un temporada di karnaval plasentero.
