KRALENDIJK- Por konsiderá e insidente ku a sosedé djabièrnè 31 di yanüari komo un página skur pa deporte futbòl na Boneiru. Durante e partido SV. Juventus kontra VS. Vespo rèfri Glenson Bernabela a saka karchi kòrá pa e hungadó Alexsander Piard di Vespo. Dado momentu e situashon a eskalá di tal forma ku Piard a agredí Bernabela. El a dal e ku moketa fuertemente den su kara.
E víktima, den e kaso aki e rèfri a akudí na departamento di Emergensia di Fundashon Mariadal i aki a risibí tratamentu médiko te den oranan lat di anochi. Segun informashon ku BONERIANO ta disponé di dje, mientrastantu Bernabela ta desidido pa hasi denunsia na Kuerpo Polisial Hulanda Karibense (KPCN). Pues un partido di deporte finalmente ta kondusí na un investigashon penal.
Un situashon sigur di lamentá ku a sòru pa basta konmoshon den seno deportivo riba nos isla. Riba medio sosial por nota diskushonnan fuerte spesialmente tokante e sanshon ku mester sigui. Tantu den seno deportivo komo pafó di e seno ta eksigí pa Federashon Futbòl Boneriano (FFB) tuma un posishon fuerte i desidido den e kaso aki. “Sóbadje nos falta rèfri. FFB mester sali dilanti i mustra ku e ta sostené rèfrinan”, un amante di futbòl ta kompartí.
FFB pa medio di un komunikado di prensa a informá ku ta posponé e próksimo tres weganan di nan kampionato. Ta posponé e siguiente partidonan: Arriba Peru vs. Vitesse di ayera; Atlétiko Flamingo vs. Real Rincon di awe i Atlétiko Tera Cora vs. Young Boys ku mester tuma lugá 5 di febrüari próksimo.
FFB: “Direktiva di FFB ta desaprobá aktonan di agreshon kontra kualke persona durante partidonan di futbòl.”
BONERIANO a hiba kombersashon ku vários persona i mayoria ta haña ku mester bin sanshon mas pisá pa asina manda un señal kla i raspá ku no ta aseptá agreshon riba fèlt. “Mester kastigá e tim kompleto i no e hungadó so. E kos aki ta inaseptabel”, ta un di e vários komentarionan riba medio sosial.
Segun ekspertonan di deporte, insidentenan di eskalashon i agreshon riba fèlt di futbòl ta sosedé ku regularidat i no por sigui ignorá e problema. Apesar ku mester tin sanshon fuerte riba akshon i kondukta manera esun di djabièrnè último, no por deskartá e importansia di formashon adekuá pa hungadónan i tambe rèfrinan.
Kada tim di futbòl tin e tarea pa organisá programanan i aktividatnan di formashon mental. Un hungando mester siña kon dil ku e adrenalina di wega i kon pa atendé ku situashonnan fèrfelu riba fèlt.
“Deporte tin di aber ku disiplina, rèspèt i e sentimentu i un komportashon spòrtif. Kada tim ta responsabel pa keda rekordá i enfatisá e norma i balornan aki”, un eksperto ta bisa.
