KRALENDIJK – E kaso di e hòmber di St. Eustatius Lamar Ulrick R., riba kua BONERIANO a elaborá den su edishon di djaluna último, ta realmente tristu. Ta un pashènt sikiátriko, un tipo di persona pa kende no tin yudansa direkto den Hulanda Karibense. Pues, henter un Hulanda, un pais asina sosial, no ta proveé den kuido di personanan asina. Mr. Marlon Hart, abogado den e kaso penal kontra Lamar a duna un bon bista di situashon di su kliente.
E akusado ku no ménos ku 10 akusashon kontra dje, a atmití ku el a kometé kasi tur kos. Mayoria di akusashon ta konserní aktonan di destrukshon ku el a kometé aña pasá tantu na su isla natal St. Eustatius komo na Boneiru, kaminda el a yega pa haña atenshon serka e instituto Mental Health Caribbean (MHC). Pero un insidente ku a sosodé na un dje kasnan ku MHC ta usa pa duna kuido, unda Lamar a pega kandela, a pone ku el a resultá riba kaya, sin pariba i sin pabou.
Abogado Hart a trata ta skèts bida di e akusado, un hòmber ku no tin un dak riba su kabes. E ta un pashènt sikiátriko, no tin lugá pa baña, hasi su nesesidat i kome. Esta si e haña kuminda. Danki Dios pa Krusada Walkin ku a suministrá e akusado ku kuminda.
Un siudadano ku a haña basta molèster di Lamar tabata Rudy Jacobs, ku tin un kas antiguo djis pabou di Krusada. Jacobs a sera e kas aki, drechi bentana i porta, pero Lamar, buskando lugá drumi a fòrsa bentana i porta pa e por a drumi
“Loke mi kliente a hasi ta di solamente drenta pa drumi anochi den edifisionan na tantu Statia komo Boneiru. Na Statia por ehèmpel den e terminal di aeropuerto. Na Boneiru den e restorat Tasca de Oso i RBC Royal Bank.
Durante vários anochi hendenan ku tabata trafiká riba Kaya Korona a mira e akusado drumí anochi bou di e parada di bùs dilanti Tung Fong Store. Un anochi e no por a soportá mas di drumi bou dje afdak aki, e akusado a bai kibra pa drenta e edifisio di RBC djis pa drumi. Meskos el a hasi na e restorant Tasca de Oso.
Abogado Hart a bisa ku su kliente ta aparentá un persona ku problema mental. Ta di lamentá ku no tin kuido pa e personan aki riba e tres islanan BES.
–FOTO
Abogado Marlon Hart.
FOTO
Lamar tabata drumi na e parada di bùs aki. Un anochi el a kana bai RBC Royal Bank pa drumi.
FOTO
Porta kibrá na e kas di Rudy Jacobs kaminda tambe e akusado tabata drumi.
