Djadomingu promé ku su instalashon Angel Obia a kuminsá sintié malu kaba. Nan a deskonseh’é pa bai misa. Pero Angel a kontestá: “Mi no por keda sin bai misa!”
Djaluna e no por a bai reunion di Jonge Wacht, pasobra e tabata malu. E no por a bai skol tampoko.
Djárason el a bolbe bai skol. Kisas e kier a hasi duru, pa maske ta dia 24 di yüni, dia di su instalashon, e no ta malu. Pero su manesé e tabata malu atrobe ku mashá doló den su wowonan.
Djasabra el a haña doló di kabes atrobe. Nan a konsultá ku dòkter. Sùrnan tambe a manda un papel pa siña ki remedi Angel mester a usa. E mes a lesa e papel i a hari un poko, bisando: “Grip ta un otro kos ku un simpel ‘verkoudheid.”
Djadomingu su estado a bira pió. De bes en kuando asta lágrima tabata bini den su wowo di doló di kabes ku e tabata sinti. Pero e tabata ke soportá tur kos mas ketu posibel.
Angel tabata grave. Ora su ruman muhé a bini serka dje, el a bis’é: “Mi kabes ta morde asina tantu ku mi ta muri si mi keda aki. Si mi bai hòspital mi por bira mihó.”
Pero su ruman muhé no por a kere ku ta den serio Angel tabata papia. Mas bes el a yega di papia di morto.
Angel mes a sinti ku morto tabata biniendo. E tabata sa ku diabel lo hasi su último esfuersonan riba un moribundo. Angel pa e motibu ei a haña miedu i el a bisa su mama: “Mi tin miedu. Keda drumi serka mi, Machi.” E kier tabatin un ángel wardadó mas serka dje.
Djamars e kentura di Angel a subi asina tantu ku el a pèrdè konosimentu. El a pèrdè kontròl riba su palabranan. Dòkter i pader a bini serka dje. Dòkter a suponé ku por tabata meningitis, o sea “hersenvliesontsteking”. A duna òrdu pa transportá Angel imediatamente pa hòspital.
Entre 5’or pa 6’or, Angel a bolbe na su tinu atrobe. Ambulans tabata kla ta sper’é dilanti kas. I muriendo kasi nan a karg’é hiba den e vehíkulo.
Manera Angel tabata sa ku e lo no a mira Santa Rosa mas. Sinembargo el a keda kompletamente trankil.
Ora ambulans a kuminsá move pa bai, el a lanta su kabes, sostené ku un di su mannan, pa el a tira un último bista riba su kas i besindario. Algun mucha chikitu ku tabata ei banda a opservá: “Angel no ta malu. El a bira mira mi!”
Angel a laga su kabes kai riba e kusinchi atrobe. Pero ora e ambulans tabata pasando dilanti misa i kas di pastor, el a bolbe lanta su kabes doloroso ku basta difikultat, pa e duna un último adios di amigu na su misa, unda su amigu dibino ta biba, su amigu íntimo ku el a stima asina tantu. El a tira un último bista tambe riba konbento di sùrnan, ku tabata semper bai asina bon p’e. Pa di último bes el a mira su kas di klup, di kua e tabatin rekuerdonan asina agradabel komo Jonge Wachter. Ku un último bista di gratitut Angel a despedí di tur e lugánan ei i a pone su kabes kansá i doloroso riba kusinchi atrobe. El a sera su wowonan kansá te ora nan a pon’é riba kama na Hòspital St. Elisabeth.
E promé mainta despues ku nan a hiba Angel hòspital su mama a bishit’é. Angel a papia kuné di un manera kalmo i ku un naturalidat manera ta riba kualké kos e tabata papia. El a bisa: “Machi sa kuantu tabata falta pa mi a muri ayera? Mi tabatin 41 gado di kentura!”
Mèrdia un primu di dje a bin mir’é, pero e momentu ei Angel tabatin un kentura haltu i e tabata for di su konosimentu. Su primu a puntr’é kon ta bai, kon e ta sinti, riba kua Angel a kontestá deliriando: “Ai, mi no ke biba mas. Mi no ke tin nada mas den mundu. Mi ta mira hopi ángel bunita. Sùr a pasa mi un angua pa mi sosegá. Ki dushi!”
Poko despues su mama a bolbe bin mir’é, pero e tabata leu for di konosimentu i e no por a rekonosé su mama mes. Pero e por a papia sí i el a bisa: “Bai for di mi. Mi no ke papia ku ningun hende.” Luego el a bira su kara pa muraya i el a kue su rosario i kuminsá resa.
Situashon di Angel tabata bira kada dia mas malu. Despues di mèrdia kada bes su kentura tabata subi i e tabata pèrdè konosimentu. Pero mainta asina semper e tabata bon na tinu, ora ku su kentura no tabata haltu. E ora ei semper bo tabata hañ’é ku un sonrisa riba su kara i ku tur kalmá. I si un hende puntr’é kon ta bai, e tabata kontestá: “Bon! Mi ta sinti mi bon!”
Si nan puntr’é ku si e tin doló di kabes, e tabata kontestá: “Aki banda un poko”, mustrando na banda robes di su kabes.
Diferente dòkter kaba nan a yama i konsultá, pero nan no por a bini kla ku siguridat kiko tabata falta Angel. Nan tabata kere ku tabata tífùs i nan a haña mihó pa pon’é den un kuartu mas ketu, esta kamber nr. 3. Pero ya Angel tabata konosé e kuartu ei for di e promé bes ku e tabata na hòspital. I el a bisa den su mes: “Kuartu di hende ku ta bai muri.”
Sinembargo Angel kier a sigui duna su mama speransa i animand’é poko el a bis’é: “Nan a trese mi aki den pa mi haña mas aire fresku.”
Pero tin ora atrobe e tabata rekonosé dilanti su mama ku e lo no bira bon mas: “Machi, mira e bòrchi ei kon malu mi ta!”
Tin bes e tabata kontestá nan pregunta ku e palabranan aki: “E kabes aki no ta pasa.” I tin bes nan tabata bis’é ku nan tabata spera ku e lo bira bon pronto, pasobra nan tin mester di dje. I e tabata kontestá nan ku un sonrisa: “Mi tambe ta spera!”
Angel tabata mashá sumiso na boluntat di Dios. E tabata sa tambe ku e tabata rondoná di bon ángelnan wardadó, sùrnan ku lo no lag’é muri sin último santu sakramentu. I e mes ta kòrda e palabranan ku el a yega di bisa otro hende tin bes: “Ora morto ta bai hasi su entrada, anto hende no por kit’é.”
Sùrnan mes a atmirá kon e tabata sigui resa su orashonnan, ku kalmo i deboshon, apesar di e doló teribel ku e tabatin na su kabes. Ni un bes nan no a tend’é keha di doló.
