Mi suegra ta konvensí ku ami ta e kria di e kas aki. Mi ta Angela, un señora latino ku tei pa limpia kas i kuid’é. Anto lesadó, bo mester skucha kon bon mi suegra ta papia spañó. “Abre la puerta querida”. Asina e ta bisa kada bes. Ami ta kontestá tur biá meskos. “No no. Mas tarde dueña.” Mayoria biá e ta keda trankil despues di mi kontesta. Awèl mi ta sigui su pensamentu ku mi ta Angela.
***
Mi a ripará ku e gusta e idea ku mi ta Angela. Promé, mi tabata korigié i bis’é ku mi ta Nathaly kasá di su yu hòmber. “Ta straño”, e tabata reakshoná. Pues ya mi no ta korigié mas. Prèt ta ku nèt e dia ku ami mes ta pretendé di ta Angela kos ta kambia. Ayera mi a bis’é, “dueña ya es hora para dormir.” Awèl mi suegra a wak mi manera mi kabes no ta bon. “Ta ki falta Nathaly anto?” Asina el a bisa mi. Pues awor mi a disidí ku mi ta warda wak ken e ta haña mi ta promé mi papia.
***
Mi ta haña humor hopi importante. Mi gusta hari i hasi wega. Humor ta laga mi relativá situashon, positivo i negativo. Mi a heredá esaki di mi tata. Asta riba su kama di morto, den su último oranan el a pone nos hari.
***
Esei tambe tabata loke a atraé mi promé den mi kasá. Su manera di pone mi hari. Te ainda, despues di tur e añanan kasá ainda e ta pone mi hari. Asta ora mi ta rabia kuné, e ta laga mi hari.
***
Un hende ku tin un gran sentido di humor ta Bòi Antoin. No komprondé mi robes, Boi sa ta hopi fèrfelu. Pero Bòi ta e tipo di hende ku por mira humor den tur situashon. Bo konosé un hende ku ta tenta bo, tèr bo i na mesun momentu e ta pone bo hari? Esei ta Bòi. Ta despues ku bo a hari bo barika yen bo ta realisá ku ta fèstbòl el a pasa bo. Masha dia nos no ta traha ekstenso ku otro mas manera promé. Esei mi ta sinti falta di dje. E humor den e trabou aki.
