KRALENDIJK- Hennyson Thielman kende ta lider di partido MPB ta amplia tokante e ‘Seniorenregeling’ ku últimamente a lanta hopi stof den komunidat. Thielman ta haña ku Clark Abraham ta despresiá derecho di trahadó i ta spera ku Anthony Weber por bòltu e kaso bek.
E ta splika ku durante e periodo di gobernashon di 2019 – 2023 ku partido MPB a forma parti di dje, nos a bini ku un maneho adaptá pa empleadonan di gobièrnu baha adelantá ku penshun, e asina yamá ‘seniorenregeling’. Pa a yega na e areglo akí, ku anteriormente no tabata eksistí ainda, nan a hasi un investigashon den e aparato públiko promé. E investigashon akí a mustra ku vários empleado públiko di 55 aña bai ariba tabata deseá pa yega na un areglo pa nan por baha ku penshun mas tempran. Diferente empleado públiko a duna di konosé ku nan ta kansá. Tin di nan ta trahando mas ku 40 aña kaba na gobièrnu di Boneiru i nan tabata deseá algu otro. Nan a duna e empleadonan públiko akí e oportunidat pa por baha ku penshun mas tempran, introdusiendo e asina yamá ‘seniorenregeling’. E areglo akí a kai den bon tera kaminda mas di 100 empleado públiko, repartí den 3 grupo a hasi uso di e areglo akí, pa motibu ku e areglo ta kumbiní nan. Ku e promé 2 grupo kosnan a kana bon.
Opheshon di Abraham
Mas aleu e ta bisa ku Gobièrnu a kambia i lamentablemente diputado Abraham a skohe pa no sostené e ‘seniorenregeling’ akí, i kosnan a pega ku grupo 3 ku ta un grupo di algu mas ku 20 empleado públiko. Es mas, ta for di den oposishon kaba Abraham tabata kontra e ‘seniorenregeling’, kaminda el a bringa e areglo akí den diferente forma. Entre otro e tabatin opheshon kontra e montante di sèn ku mester a pone disponibel pa por a finansiá e areglo aki. Ora el a bira diputado, Abraham a skohe pa bai te hasta korte kontra e empleadonan públiko akí.
Un ahuste chikitu
Promé ku e situashon a eskalá, e grupo di empleado públiko en kestion a sinta ku diputado Abraham huntu ku sindikato ABVO. Nan a splik’é un situashon ku a surgi ku no tabata premirá promé ku a firma e ‘seniorenregeling’. Tur hende na mesa por a mira ku mester a ahustá algu. A mustra diputado Abraham riba esaki. Si e diputado tabata dispuesto pa kambia esaki, e por a hasié pasó no ta trata aki di hopi sèn ku lo hasi un impakto grandi riba presupuesto di gobièrnu, pero sí e ta hasi un diferensia grandi pa e empleadonan públiko akí. Ta trata di empleadonan públiko ku pa hopi aña a traha pa gobièrnu di Boneiru i ku awor ta hasi un apelashon riba nan derecho. Loke nan ta pidi ta algu mas pa mantené nan salario kaminda e ta, pa nan no bai hopi atras na entrada na momento ku nan baha ku penshun. Esaki ta e situashon, pero diputado Abraham a skohe pa bai kontra di e grupo di empleado públiko akí. El a nenga di firma loke ku tabatin riba mesa i tambe nenga di buska un solushon na interes di e grupo di empleado públiko akí.
Weber a primintí solushon
A yega asina leu ku a bai korte. Diputado Abraham a prepará fuerte pa e kaso akí, buskando un bufete di abogado pisá pa bati e grupo di empleado públiko aki i bati e ‘seniorenregeling’, despresiando nan derechonan. Netamente esaki ta e motibu pakiko nan no a haña e ahuste ku nan tin derecho riba dje: pasó diputado Abraham a skohe pa bai guera kontra e empleadonan públiko akí. Ta esaki ta e kolega ku Weber mester bai traha kuné. Thielman: “Nos ta kontentu di tende ku Weber sí ta dispuesto pa kambia i drecha e situashon akí, manera el a primintí. Nos ta spera ku e ta logra konvensé diputado Abraham ku a nenga di yuda e empleadonan aki. Nos ta kere ku esaki ta e úniko manera pa atendé ku hende, esaki ta e úniko manera pa atendé ku siudadano i esaki ta e úniko trato korekto pa duna bo empleadonan.”
