KRALENDIJK- Elvis Tjin Asjoe no ta kla ku polítika. Komunidat di Boneiru por ferwagt Tjin Asjoe riba lista di partido polítiko Movementu di Pueblo Boneriano (MPB) den e elekshon benidero. Despues di e último elekshon Tjin Asjoe a alehá for di polítika. Esaki a pone ku hopi hende a pensa ku el a stòp di ta aktivo den e arena polítiko. Apesar ku el a keda aktivo den partido MPB. Awor tin rumornan persistente ku Tjin Asjoe no solamente a intensivá su tareanan polítiko. Tambe ku elo ta riba un puesto prominente riba lista di MPB den e próksimo elekshon. BONERIANO a aserká Elvis Tjin Asjoe pa konfirmashon di e informashon aki. E ta splika ku despues di e último elekshon el a tuma tempu pa reflekshoná i analisá. Esaki mas bien riba tereno personal. Ta konosí ku Tjin Asjoe a sufri pèrdida di sernan kerí den e último tempu. “Mi ta hañando basta reakshon i señal for di pueblo mes ku ke mira mi bèk den polítika”, e ta splika. Básikamente Tjin Asjoe ta splika ku e situashon aktual den gobernashon, e mal kontentu den komunidat i e gritu pa kambio di hopi hende ta motiv’é pa duna di su parti. Pues Tjin Asjoe lo ta riba lista di MPB? I na kua lugá? “Nunka mi ta stòp di bringa pa Boneiru. Pero al final ta partido ta disidí. Ami ta kumpli ku deseo di pueblo i di partido”, Tjin Asjoe ta agregá.
