(2 kol arial bold)
Kon un simpel bòter ku un karta den dje, tirá den laman na 1964 for di un tènker di Shell, por a kambia bida di dos persona, tresiendo nan huntu den barku matrimonial. E mucha hòmber di 11 aña e tempu ku a skirbi e karta ta Marinus van Asten di e siudat Helmond. E mucha muhé tabata Fransisca (Tica) Cicilia di Boneiru. Awor nan tin 47 aña kasá.
(1 kol arial)
Pa konosé esensia di e storia aki nos mester bai bèk 1964, tempu ku Krus Kòrá di Hulanda a tene un akshon titulá ‘Kinderhanden smeden vriendschapsbanden’. E kampaña tabata enserá ku muchanan na Hulanda por a skirbi un karta pa bai den un bòter, ku despues lo laga tira na laman. Seguidamente mester a sinta warda riba reakshon. A tira e bòternan na laman for di un tènker di Shell.
Lagun
A pasa tres aña i e bòter ku karta a drif drenta boka di Lagun na Boneiru i a subi tera na e playa yamá Santu Atras den e bahia. Jose (Djo) i Johanna (Yuchi) Coffie di Antriol tabatin kustumber di frekuentá e sitio aki huntu ku nan yu di kriansa Tica, ku nan a tuma kria for di tempu ku e tabatin 1 aña.
Tica a mira un bòter riba e playa i a nota ku tabatin un karta den dje. Outor di e karta aki a resultá di ta Marinus van Asten di Helmond, Hulanda. Tica a mand’é un pòstkart i asina nan a sigui skirbi, te na momentu ku amor a drenta e wega.
Marinus van Asten, despues di a korespondé via karta ku Tica pa algun tempu, a bis’é: “Ik hou van je.” E amor a bira mutuo. Nan a disidí di kasa. A efektuá e matrimonio aki 47 aña pasá.
FOTO (Tica1)
Marinus i Tica tempu ku nan a kasa 47 aña pasá.
FOTO (Tica 2)
Aki por mira Marinus i Tica van Asten riba un foto saká algun siman pasá.
FOTO (Tica 3)
Lagun, na unda e bòter a drenta i subi kosta na Santu Atras.
