KRALENDIJK –– Na final di Regata, BJSC a biaha pa Aruba pa kompetí na Aruba Chess Challenge. Tabata un torneo hopi pisá kaminda a mira e entusiasmo di na Aruba ku a krese na kantidat di partisipashon.
Tabatin djestres pais presente i 155 partisipante den e torneo di FIDE. Pero BJSC ta satisfecho ku e partisipashon serio di e alumnonan i ku un otro biá lo bai prepará mihó pa e partisipashon.
Den U18, tabata Clé Burgers ku a hunga un bon torneo. El a keda sorpresá dor di Sylvi Cabral, un damita di Aruba ku a krese hopi. Den e último buèlta e ta pèrdè di e hóben Gajadien Vashist di Sürnam i ta keda ku 5 punto den shete buèlta. Seis hungadó tabatin sinku punto i Clé ta keda na di sinku lugá, pero ta gana e premio Best U16.
Adrián Fernadez a keda ku kuater punto i Klavin Espinal ku tres punto. Winson Cen a keda ku kuater punto. Den U18, tabatin 42 hungadó.
Den U12, Matthew Wu ta sorpresá Daniel Fransico den e di tres buèlta. Tur dos ta kaba ku sinku punto den un grupo di sinku, ku no tabata sufisiente pa un premio. E pèrdida kontra Colin Koolman a pone ku Koolman ta sali na di tres lugá i Matthew na di kuater. Daniel a kai te na di shete lugá. Jerónimo Lont a keda na di 15 lugá ku kuater punto i Nathan Guiterrez na di 18 lugá ku tres punto i mei.
Den Open, Christiaan Smeets a bataya fuerte kontra esnan ku título i a keda ku 4 punto i mei den un grupo di kuater i ta sali na di ocho lugá, despues di a pèrdè den e último buèlta kontra e internashonal master, Jasel Lopez, di Aruba. Den Open tabatin 41 partisipante.
BJSC ta gradisí INDEBON ku a yuda ku un parti di e gastunan i tambe otro spònsernan i mayornan mes ku a paga pa nan yu partisipá. Tambe BJSC ta gradisí Charles Lont i Kathiusca Coromoto, pa nan dedikashon i koperashon den e biahe.
