KRALENDIJK –– Djaluna Grupo Flor di Orkidia a organisá último aktividat pa 2025. Durante e anochi e grupo a presentá nan unifòrm nobo, sigur un beyesa di unifòrm. E mesun anochi, Fundashon Maskarada a honra Donko Cicilia, manera nan ta yam’é.
Un representante di e grupo a bisa: “Na promé nos ta yama danki na direktiva di Flor di Orkidia 60+, pa duna nos e oportunidat awe anochi, pa nos honra un baluarte. Nos baluarte ta Donko Cicilia. Donko a lanta den bario di La Union, pariba di Nòrt di Saliña.”
Donko mes no tabata presente i e grupo di maskarada a hasi entrega na un representante. Despues nan a sigui ku tokamentu i baliamentu.
Adultonan mayó di Flor di Orkidia a pasa masha dushi mes e anochi. Un alegria total.
Enid Semeleer a bisa: “Nos programa a kuminsá normal ku orashon, despues nos a rekordá Sanikolas i nos a rekordá kon nos tabata kanta pa Sanikolas. Na bos alto tur a kanta: Sinterklaas kapoentje. Esta dushi ta pa rekordá tempu nos tabata mucha. Nos a duna pabien na tur ku a hasi aña den e dianan aki. Tur a para dilanti, Tichi, Zaida, Bien, Maura, Yeta, Enid. Nos ta deseá nan salú i hopi bendishon, salú ku bolo nos ta deseá i nos a haña.”
A sigui ku un tremendo Bon Kuné i tur hende por a gana algu. A kulminá ku un tremendo selebrashon di Dia di Nort Saliña, ku un tremendo presentashon di Maskarada. Naturalmente tur a gosa un bòl. Tambe Fundashon Maskarada a honra un èks miembro, Donko Cicilia. Un tremendo anochi. Danki di kurason na Fundashon Maskarada, ku a koperá un biaha mas ku nos grandinan, Semeleer a bisa.
