Fiesta
Promé Lektura : Isaías 42, 1-4. 6-7
Salmo : Salmo 29, 1-4. 9b. 10
Di dos Lektura : Echonan 10, 34-39a
Evangelio : Mateo 3, 13-17
Hende por imaginá su mes e kara di sorpresa di Huan i su nerviosismo, ora ku el a mira Hesus presentá su mes pa e ser batisá. Dikon Hesus a presentá su mes ònferwagt , manera un di e tantunan, mei mei di hende, ;na ora di un boutismo general; pa di tal forma Huan batis’é ?. For di e teksto evangéliko por dedusí ku loke ta realmente importante den e relato no ta únikamente e boutismo di Hesus, sino nifikashon ku e boutismo akí tabata enserá. Palabra di e evangelistanan kontando loke a sosodé inmediatamente despues di e boutismo, ta enserá e klave pa komprondé nifikashon real di boutismo. ;Apénas a batisá Hesus ;, e ta sali for di awa; shelu ta habri i ta mira spiritu di Dios baha i keda para riba Hesus". E habrimentu akí di shelu, notá pa sobrá evangelistanan i e bahamentu di e Spiritu di Dios, tabata e konsagrashon di Hesus pa su mishon mesiániko i redentor. A presentá Kristu dilanti e pueblo pa konkretisá e kreashon nobo. Ku habrimentu di shelu ta kuminsá un etapa nobo den istoria di salbashon: e siklo mesiániko a keda habrí. Di awor en adelante mishon di Hesus lo tabata un mishon berdaderamente profétiko. Un profeta ku lo papia di hustisia, di amor i di pordon. Un profeta ku, siendo e mes kaminda, bèrdat i bida, lo papia ku e hendenan den un lenguahe nobo, t’e awor deskonosí, respaldando ku su obranan su palabra, pues e lo pasa hasiendo bondat. Boutismo ta konstituí Kristu den e sirbidó di Señor. Mediante infushon di e spiritu di Dios, e ta destiná ;pa habri wowo di esnan siegu, pa saka e prezu for di sèl, i esnan ku ta biba den skuridat for di prizòn;. Kristu ta e vershon nobo di e sirbidó deskribí pa e profeta Islais, i meskos ku esun aya, su obranan lo ta hustisia i derecho i su mensahe lo ta di union i fraternidat universal i su doktrina i su obranan e ;lus di nashonnan". E mishon di Kristu, ku a kuminsá na su boutismo, lo ta transformashon di mundu, kuminsando na su raisnan mas profundo, hasiendo uso di amor komo instrumento. Boutismo di Hesus no ta un suseso aislá den su bida; tabata kuminsamentu di un mishon mesiániko ku no a konkluí. E mishon aki ta yega na kada un di nos, esnan batisá, ku e enkargo pa transformá mundu, mediante implantashon di hustisia i di derecho. E mandato pa siña tur nashon, batisando nan, ta risibí tur su forsa den nos propio boutismo. Ku frekuensia hopi kristian ta konsiderá boutismo komo un ;kos” di Iglesia, un trámite ku tin ku mester hasi ;pasobra nos ta katóliko", pero no ta mir’é komo un berdadero mandato ni komo mishon pa realisá, un mishon berdaderamente profétiko. Nos profetismo, meskos ku e profetismo di Kristu, mester tradusí su mes den obra: pasa den bida hasiendo bon mester ta lema di e kristian; lucha pa implantá hustisia i derechi, ser lus di hende i yis ku ta transformá mundu. Boutismo pa e kristian ta un reto i un kompromiso. E ta un reto pa su moda di biba, pa su moda di aktua, pa su moda di papia i asta pa su moda di pensa. For di momentu di su boutismo, e kristian, huntá komo profeta i mandá komo apòstel, lo no por a biba su bida,
kómodo i indiferente. E ora ei e kristian lo mester definí su mes: òf ku Kristu òf kontra Kristu. Pa ser profeta i pa ser apóstol, lo e mester pensa ku e bondat di Dios, ku el a eksperensiá den su bida, ta krea pe un obligashon ku otronan. E lo mester tene na kuenta ku e mandato di stima otro …. siña otro i pordoná otro, ku el a risibí pa medio di su boutismo, no ta frase morto, sino bon pa ser lesá dilanti asamblea di pueblo di Dios durante selebrashon litúrgiko, sino ta un mandato ku tin ku bira realidat bibu pa duna testimonio dilanti di hende ;Boso lo ta mi testigu;, Kristu ta bisa nos ku palabranan kla i terminante. Pero laga puntra, kiko ta nifiká ser testigu di Kristu? Ser testigu ta nifiká hasi realidat, enkarná den nos bida, e mishon profétiko risibí den boutismo. E ta nifiká hiba e mensahe di boutismo na e bida familiar, den e fábrika, na ofisina, kada kaminda ku nos ta. Klaro ku pa realisá e trabou profétiko aki, pa por hasi realidat e mishon risibí di boutismo, pa ser testigunan efikas di Kristu i hiba su mensahe di salbashon pa tur hende, nos mester di kurashi, energia, balor i konstansia. Eukaristia, e sakramentu di nutrishon spiritual, lo ta e mesa kaminda nos bida kristian mediante alimento di Kurpa i Sanger di Kristu, lo risibí e energia i balor pa por ehersé nos mishon profétiko i kristian.
