KRALENDIJK- E invashon resien i kaptura di Nicolas Maduro a pone ku hopi venezolano den eksterior a subi kaya i a selebrá inmenso i públikamente. Sinembargo aki na Boneiru no ta mira e grado aki di selebrashon, e komunidat ta trankil.
Tambe por konstatá ku e komunidat venezolano riba e isla aki no ta organisá òf afiliá na un organisashon ku ta representá nan interes. Esaki kontrali di otro imigrantenan aki na Boneiru. Gregorio Gomez kende ta un venezolano bibá aki ta konfirmá esaki. “En realidat nos no tin un lugá kaminda nos ta topa otro òf un organisashon partikular”, e ta bisa.
Segun Gomez durante e último 25 añanan polítika di Venezuela a polarisá tur kos. Esaki tin su efekto riba e imigrante bibá aki tambe. Nan ta preferá pa no topa ku otro pa asina no krea konflikto òf desakuerdo.
Michiel Bijkerk di Fundashon Union di Imigrantenan Boneriano (FUIB) ta rekonosé esaki. “Venezolanonan na Boneiru no ta uní. E grupo ta partí den Chavista i anti Chavista. Esaki semper ta trese diskushonnan fuerte kuné. Pero FUIB ta traha pa tur imigrante i no ta hasi distinshon”, e ta bisa.
Gomez ta haña ku a yega ora pa kambia pensamentu. Gomez: “A yega ora pa pone kabes huntu i sinta huntu. Pa asina yega na mehoransa di nos bida kotidiano.”
