Esnan ku konosé mi bon sa ku mi no ta hende di karnaval. Bida mes ta un karnaval kaba. Mi no ta mira nesesidat pa mas karnaval den mi bida. Pero mi mester atmití sí ku Lord Lally di Aruba ta kaptando mi atenshon i a gana mi kurason. Mi ta simpatisá ku Lord Lally, pa motibu di su simplesa i su humildes.
***
Lord Lally, kontra tur ekspektativa di kantante i músikonan di Aruba ku a kere ku ta nán mester a gana e título di rei di kalipso (òf ta soka?), a bai ku e título aki. Pueblo a karga Lord Lally kompletu, miéntras ku algun artista i grupo musikal ònspòrtif na Aruba (lamentabel ku tin boneriano tambe den nan!) ta purba bòikotiá Lord Lali. Pero ganá ta ganá te den porta di Shon Arei.
***
Riba facebook mi a topa ku un bunita dedikatorio na Lord Lally. Mi ta kompartí un parti di e teksto ku boso: El a soña, el a pidi ayudo, bandanan popular a neng’é. Afteròl un banda ménos popular a yud’é. El a ensayá, el a demonstrá kurashi, el a sigui ensayá, nan a harié, el a bai tòg. Awe e ta nos rei. No pensa mes ku e no a traha pa su título. El a pèrdè pa mas ku 50 aña…. El a papia malu di e ganadónan? No! El a sigui kere den nos festival! I el a sigui partisipá!
***
E persona ku a publiká e dedikatorio aki na Lord Lali ta konkluí: “Ami ni konos’é, pero ta emoshoná mi di mira awe kon pueblo a asept’é i aploudié riba ruta! Pabien Lord Lally!”
***
Mi ta duna e persona ku a pone e dedikatorio aki na Lord Lally un ‘10’. El a deskribí e ‘fenómeno Lord Lally’ manera ami tambe a bib’é. Loke a impreshoná mi ta e humildes di Lord Lally. Pone mi kòrda e tempu ku Papari Thielman a bira rei di tumba di karnaval na Boneiru. Tambe un persona simpel i humilde.
***
