“Laman ta duna, laman ta tuma.” Esaki ta un dicho hopi konosí na Boneiru, na unda un parti grandi di su hòmbernan tabatin un òf otro relashon ku laman, sea komo piskadó òf nabegante. Hopi a subi laman sin nunka regresá kas. Tambe tabatin hopi noufragio di barku alrededor di Boneiru.
E odisea di Annah J
Den historia di Boneiru, banda di barkunan ku sa dal kibra riba kosta di e isla, na vários okashon a tou boto i barkunan ku a haña problema tékniko, trese haf di Kralendijk. Un di e barkunan aki tabata Annah J, ku a yega den haf di e isla di tou pa e barku Pan Atlantic di Atlantic Lines.
Tabata 28 di sèptèmber 1970 pa masoménos 7’or di mainta. E barku di motor aki tabatin na e momentu ei ya 12 dia pèrdí riba laman. E doño di e barku Annah J tabata un tal Richard Jones, kende, den un deklarashon hasí na e hefe di Kuerpo di Polis e tempu ei, P.M.H. Franssen, a relatá loke a pasa ku nan riba laman.
Richard Jones a kuminsá na splika e funshonario polisial Franssen ku e mes ta doño di e barku Annah J. El a nase na e isla St. Vincent riba dia 10 di òktober 1930, di profeshon marinero, bibá na 39 Street Delft, Camberville, Guyana.
E barku Annah J di 19.93 tòn tabata nabegá bou di bandera guyanes. E base dje barku tabata tambe Georgetown, Guyana.
Dia 8 di sèptèmber 1970 pa masoménos 10’or di mainta Annah J a sali for di Guyana ku destino Grenada ku un kargashon di palu i aros na bordo. E biahe a bai sin masha problema i dia 13 di sèptèmber e barku a mara den haf di Trinidad pa almasená awa na bordo.
Problema
E kapitan a sigui konta ku e tabata nabegá e barku pokopoko, pa asina no fòrsa e motor, komo ku no masha dia promé el a laga overòl esaki. E motor mes no tabatin problema, pero sí el a konstatá ku tabatin problema ku e suministro di kombustibel pa e motor.
“Mi a kaba di kumpra e barku i esaki tabata pa mi su promé biahe. Durante e biahe m’a bin ripará ku e tanki di kombustibel tabata hopi bieu i ku kada bes frus tabata akumulá den e pipa ku tabata bai e motor. Dia 16 di sèptèmber den oranan di mèrdia nos a sali for di haf di Trinidad. E siguiente dia, ku tabata djaweps 17 di sèptèmber, mi a mira lus dje faro di Grenada pa masoménos 2’or di mardugá. Na momentu ku a bira dia mi por a mira Grenada bon kla drumí nos dilanti”, Richard Jones a konta.
Jones a sigui splika ku pa masoménos 8’or di mainta, momentu ku nan tabata hasiendo preparashon pa bai drenta e haf di Grenada, diripiente e motor di Annah J a paga.
Na promé instante, segun Jones, el a kere ku atrobe esaki tabata problema okashoná pa pipa ku a fèrstòp, loke enbèrdat tabata e kaso, pero e bia aki hopi mas serio ku e okashonnan anterior. Jones a trata, manera el a hasi anteriormente ora ku e mesun problema a surgi, di dal e pipa, pero e bia aki si e problema no a resolvé.
Jones: “E ora ei mi a lòs tur pipa i a spula nan. Pero komo ku mientrastantu nos no por a stür e barku mas, laman a logra penetrá via e burakunan di e exhaust, yegando te den e motor. Na e momentu ei m’a bin realisá ku lo mi no por a logra start e motor mas, komo ku e magnet a muha. Nos a traha un bela di emergensia, pero esaki no a yuda masha.”
(Ta sigui den edishon di mañan
FOTO
E barku Annah J a pasa hopi pegá ku Grenada. Nan por a mira e serunan di e isla, pero no por a nabegá bai kosta.
