Bèk na Hulanda na 1984, despues di nos añanan na Boneiru, nos a haña un kas den e pueblo na unda m’a nase. Desde ei m’a traha komo dosente na un skol na Breda pa muchanan ku difikultat pa siña.
Despues di 10 aña mi a haña e chèns pa ku mi konosementu i eksperensia, for di nos skol, bai guia maestronan den enseñansa básiko den region di Breda. Esaki a kuadra bon den e proyektonan ‘Weer Samen Naar School’ i despues ‘Passend Ondwerwijs’.
Speransa tabata ku pa medio di esaki ménos mucha lo a bai enseñansa spesial. Pero esaki a resultá te awe un konsepto eróneo. De fakto e tabata tambe un medida ordinario pa spar gastu.
Banda di nos dos yunan nasé na Boneiru, mientrastantu nos di tres yu a nase. Pues dos boneriano i un makamba. Famia a krese i nos a muda pa un otro kas, situá na rant di nos pueblo.
No opstante ku nos bandoná Boneiru na 1984, Boneiru a keda den nos kabes. Konstantemente den nos famia e storia i fotonan di Boneiru a keda den pasa manera un bunita pelíkula. Rekuerdonan bunita. Kasi kada sinku aña nos a bula bai bèk Boneiru. Nos tabata keda den un kas vakashonal, na e sitio kaminda nos mes a biba den pasado, esta na kas di Smith Boekhoudt. Asina nos tabata sinti nos mes kada bes na kas.
Pero e kambionan riba e isla aki, ku mi stima i por yama mi isla tambe, ta birando mas i mas agudo.
Unda ku den mi pueblo natal e poblashon a subi di 5.000 habitante na 1975 pa 5.900, na Boneiru den e periodo ei a subi di 6.000 pa 26.000 habitante. Durante kada bishita ku nos a realisá na Boneiru por a mira un kresementu i preshon eksplosivo den tráfiko, kantidat di kas, barionan residensial nobo yen di kas riba otro, hotèl, tienda, supermarket i negoshinan den hóreka. Diripiente nan a bini. No tabata ‘nos’ Boneiru mas.
Den e siguiente epílogo, 50 aña despues, mi ta bai skirbi di mi último eksperensianan na Boneiru durante nos fakansi. Mi ta usa hopi foto pa pone konekshon ku 50 aña pasá.
FOTO
Karnaval den pasado. Por mira entre otro Dolfi Davelaar.
FOTO
Nos a eksperensiá karnaval e aña aki na Boneiru.
FOTO
Malekon den periodo ku nos a biba na Boneiru.
FOTO
Malekon awendia.
