Nos naturalesa ta bou di preshon enorme. Trahamentu di kas tur kaminda, loke ta pone ku partinan grandi di nos naturalesa ta bayendo pèrdí. Banda di esaki tin un sekura severo ta asotando Boneiru. Durante temporada di yobida na fin di aña pasá práktikamente no tabatin áwaseru di importansia. Niun dam òf tanki ku awa.
***
Fuentenan di awa den nos naturalesa a òf ta disparsiendo den áreanan di Lima, Barcadera (Colombia) i otro partinan di nos isla. Parse ku niun hende ta preokupá pa e situashon aki. Basta ku traha kas i edifisio bai gol, trabou pa kontratista i lugánan eksótiko pa hende riku biba.
***
Algun siman pasá huntu ku dos miembro di Grupo Chantiwawa, Rossan i Brian, mi a bai Pos di Pepe, manera e ta indiká riba e famoso mapa di Werbata. Ta un pos hopi importante. E tin hopi awa di bon kalidat. Brian ta kana ku un aparato ku kua e por chèk mesora kalidat di awa den posnan ku nos topa durante nos ekspedishonnan.
***
Den e área grandi di Lima tin mas pos. Na e parti sùit di Kaya Randolph Statius van Eps, enfrente di e parke di buriku, tin entre otro Pos di Wayaká. Banda di dje tin mas pos. Tur kos ta indiká ku bou di suela di Lima tin un reserva enorme di awa dushi. Hopi kabritu, buriku i para ta baha na Pos Wayaká pa bebe awa. Tristu ta ku ya kaba tin plan pa traha kas ei banda tambe.
***
Mi ta kere ku di parti instansianan di gobièrnu mester sali un manera mas konkreto i efisiente pa atendé ku nos naturalesa, ku ta inkluí tambe nos posnan natural. Pa kuminsá mester hasi uso di konosementu lokal. Ámtenarnan mester bandoná nan kantor airekondishoná i drenta mondi pa konosé nos naturalesa. Bo no por manehá naturalesa sin konosé naturalesa.
***
