Silvio Alberto (Tip) Marugg (Kòrsou, 16 di desèmber 1923 – Kòrsou, 22 di aprel 2006) tabata un eskritor i poeta antiano. El a nase komo e di sinku di shete yu. Su mayornan tur dos tabata katóliko romano, pero Marugg a lanta komo katóliko i protestant. El a optené su diploma di skol sekundario (mulo) na 1942 i despues a sirbi sinku aña den servisio militar. Despues el a traha pa Shell pa vários dékada.
Miéntras e tabata kontribuí na e revista di empleado di Shell, Passaat, el a deskubrí e goso di skirbi. Marugg a publiká solamente tres novela, pero esakinan ta wòrdu konsiderá komo obranan importante di literatura hulandes-karibense: Weekendpelgrimage (1957), In de straten van Tepalka (1967), i De morgen loeit weer aan (1988).
Su obra ta karakterisá pa un ambiente melankóliko, preguntanan eksistensial, soledat, anochi, alkohòl, morto, i e paisahe di Kòrsou. Bida riba e isla ta hunga un ròl sentral, pero semper komo telón di fondo pa reflekshonnan profundo riba eksistensia humano.
Krítikonan ta kont’é entre e eskritornan mas importante ku Kòrsou a produsí. For di añanan 1970 padilanti, Marugg a biba un bida isolá riba un tereno na Pannekoek na Bandabou, kaminda hopi biá e tabata wòrdu deskribí komo un ermitaño. Su último novela, De morgen loeit weer aan, a keda nominá pa e Premio di Literatura AKO i a dun’é e prestigioso Premio Cola Debrot na 1989.
Den e último añanan di su bida, su bista a deteriorá signifikantemente, loke a hasi difísil p’e lesa i skirbi. Tambe e mester a laga amputá un pia un aña promé ku su morto pa motibu di un infekshon.
Aunke el a lanta kristian, Marugg no tabata religioso. Esaki a sirbi komo un motivashon p’e skirbi, den un intento pa duna sentido na bida. El a fayesé dia 22 di aprel 2006, na Kòrsou, na edat di 82 aña.
