Seru Grandi ta revelá paisahe impreshonante
Grupo Chantiwawa a traha den forma dediká i intensivo último simannan riba un ruta di kana nobo riba Seru Grandi. E ruta aki ta bai yama Ruta Joselito Oleana, un dje pilánan fuerte di e grupo aki, kende a fayesé aña pasá den forma inesperá.
Djadumingu último nos a kaba ku e ruta básiko. Mañan nos ta bai hasi algun trabou ku falta ainda. Ku esaki Boneiru ta haña un ruta di kana úniko i bunita.
Mas i mas, trahando riba e ruta, nos a bin realisá kon bunita e área aki ta. No tabata fásil pa a traha e ruta aki. Tabatin partinan difísil pa habri, pero nos a logra. E ta hiba nos un área skondí, pero hopi bunita. Nos ta laga e fotonan papia pa nan mes.
