KRALENDIJK – Zùs su deseo ta kumplí. Su restunan ta sosegá desde ayera mainta na Spelonk, na unda su tata Mario Winklaar a traha den pasado komo wardadó di torno. Promé ku Zùs, último añanan, a stroi shinishi tambe di su dos rumannan Miranda i Oko na mésun sitio, despues di nan morto. Yunan di Mario a lanta ku hopi afinidat i amor pa Spelonk. Komo ku nan tata tabata traha na e sitio i tabata keda dos siman for di kas, nan tabata bai e sitio aki hopi. Tin biá ku nan tabata keda drumi tambe den e kas di torno. Tres di e yunan di Mario ku mientrastantu a fayesé a ekspresá deseo pa kremashon na momentu ku nan muri i pa tira nan shinishi na Spelonk. I esei a sosodé djabièrnè tambe ku Elis Cicilia van der Hans Winklaar, mihó konosí komo Zùs òf Sechi. Dia 7 di ougùstùs 1949 Zùs a nase den e bario Antriol. Despues famia Winklaar a muda pa Aruba. Mas despues el a biba na Hulanda, kaminda el a fayesé dia 20 di yüni 2025. No ménos ku 41 aña Zùs a biba na Hulanda.
