KRALENDIJK – E ohochi Jacinta Foendador-Theodora i Beacinta Sweetnam-Theodora a kumpli 85 aña. Nan a selebrá huntu ku nan famia, amigu i konosínan. Beasinta a nase promé pa 5or di mainta, miéntras ku Jacinta a nase pa 10or mésun mainta na hòspital.
Jacinta i Beacinta tabata den e programa Herensia den pasado pa papia tokante nan bida. Nan a nase na Antriol komo yunan di Ròbu i Clara Theodora. Na nan nasementu a surgi komplikashon. Nasementu di Beacinta a bai normal, pero Jacinta no kier a sali. Despues a yama dòkter, ku a akudí na nan kas. Dòkter mes a hiba Clara hòspital pa saka Jacinta.
E dos rumannan a bai St. Bernardusschool. Ku edat di 14 aña nan a bai biba na Kòrsou. Nan promé trabou tabata den hòspital St. Elisabeth.
Probablemente Jacinta i Beacinta ta e ohochi di mas edat na Boneiru aworaki.
