KRALENDIJK

Djasabra tabata otro fecha históriko pa Boneiru momentu ku e promé avion di American Airlines a pisa suela na Aeropuerto Flamingo. Un kantidat di persona na aeropuerto tantu paden i pafó, aparte di tabata atendé ku e buelo di Continental, spesialmente sperando yegada di American Airlines na Boneiru. Alrededor di mitar di kuater e avion tan spera di American Airlines a yega i momentu ku el a aterisá bayendo pa stashoná, dos brantspùit a perkurá pa spùit awa riba e avion ku a yega for di Miami. E pilotnan tabata waya bandera di Boneiru i di Merka for di bentana, saludando tur na e área. Asina turistanan a baha for di e avion i a kana bai direkshon di Imigrashon. Esaki a sosodé di tal forma ku tur hende tabata pasa i saludá diferente persona, tambe prensa, promé ku nan yega Imigrashon. Entre otro tabata presente tur tres diputado, Maurice Adreans direktor di TCB i Miss Bonaire Ruthgainy Frans, tambe Miss Tourism Bonaire. Tabata un momentu di alegria pa tur presente, loke tabata notabel na e okashon.