KRALENDIJK–E siman ku a pasá, e klas di aspirante 2023-2025 di Kuerpo Polisial Hulanda Karibense (KPCN), a inisiá e treinen di polis den forma di un ‘ontgroening’. Djadumingu, 17 di sèptèmber, nan a klousurá e ‘ontgroening’ i e aspirantenan a marcha for di Sorobon i yega na warda di polis na Playa. Na e okashon a papia Lionel Vrutaal, kende ta kordinadó di edukashon di KPCN. “Kos bon so mi a tende di boso. Boso a hasi e proseso i awor boso ta kla pa kontinuá. Tambe boso a huramentá i e ‘opleiding’ a start. Pa 2 aña boso ta bai ta den klas ku otro, pa konosé otro mihó. Mester lucha duru pa yega final. Mi ta gradisí mayornan ku a apoyá i ta presente awe.
Famia ta sumamente importante
Famia tabata presente pa risibí e aspirantenan i yama nan bonbiní. Pa tur aspirante, tabata un sorpresa ku nan ta bai topa nan famia na warda di polis. Hopi emoshon serka mamanan i lágrima di tenshon, pa mira e miembro di famia, pará den solo tur sodá nan dilanti.
Sherman Blanken, guiadó di trayekto di aspirantenan KPCN:
“Despues di 1 siman di trabou fuerte, boso ta aki sodá, kansá, pero tur 24 ta presente. Pabien. Sa ku e reto no a kaba. E sosten mas importante den e funshon aki ta, mama, tata, ruman i henter famia.” Despues miembronan di famia presente, tabatin oportunidat pa brasa nan aspirante di polis, un tremendo momentu. Coach Roën Trinidad, a papia tokante e parti di positivismo ku e aspirantenan tin i e proseso ku nan ta kanando. Huntu nos ta fuerte! Tambe a duna honor na Amalie Melaan, ku a resaltá den e grupo. A rekonos’é komo un persona fuerte i balente.
