KRALENDIJK — Tremendo rekonosementu na Glenn Thomas na Boneiru, selebrashon dòbel di su programa Show Musikal i fecha natal. E selebrashon tabata na Kabuya Ranch djadumingu 3 di novèmber.
Pader Marc Hooijschuur a hasi orashon pa asina inisiá e selebrashon di Glenn Thomas. Promé biá e ta selebrá pafó di studio na Kòrsou.
Esei ta loke Glenn a bisa: “Boneiru ta bendishoná. Danki tur hende ku a yuda organisá e dia akí, spesialmente Elba Mercera i su tim.”
Glenn a laga Lulu Chikí papia i nan a sunchi otro i kombersá di pasado, kon nan a konosé otro i mas. Glenn ta yam’é doño di Show Musikal. Por imaginá kuantu kos nan dos a pèrkurá pe dilanti tur presente i live di Big Papa.
Konosido kantante i eskritor di Kòrsou, Elia Isenia, tambe tabata na Boneiru pa presensiá e momentu bunita, dòbel selebrashon pa Glenn.
Bintisinku aña di e programa Show Musikal i un aña mas di bida, un kantidat di regalo Glenn a risibí na e okashon. El a haña regalo di mes serka su amor Lulu Chikí i e yunan a gradisí Glenn pa e amistat di 25 aña ku nan mama i niun hende no por separá nan.
Famia Diaz tambe a regalá Glenn regalo presente Chana i su yu Lucy, Nel Piar a regal’é un tremendo kuarta, obra di Nel mes. Un hende di Hulanda tambe a regalá Glenn un regalo. Junny Gill, na nòmber di INDEBON, tabata presente na e okashon.
Despues e tim di Elba a regalá Glenn regalo i a gradisi’é pa e keda ku nos. Elba a forma un komishon pa por a selebrá riba Glenn su fecha natal e 25 aña Show Musikal. Pero e ta kumpli 25 aña dia 21 di desèmber.
E komishon ta formá pa Elba, Judessa, Miraluska, Thea, Sonny i Ramses. E komishon ta yama danki na tur ku a hasi e atardi posibel, tambe na tur agrupashon musikal krioyo, pa nan bunita presentashon i Big Papa, un danki di kurason di parti e komishon.
Agrupashon musikal MFK i Tutti Frutti a pèrkurá pa bon ambiente e mèrdia i Elia Isenia tambe a kanta poko na e okashon.
